«Ա1+» հեռուստաընկերության եթերազրկումից հետո իշխանությունները Հայաստանում համարում էին, որ ողջ հառուստաեթերը այլևս գտնվում է իենց տոտալ վերահսկողության ներքո և, որ որևէ ազատ հեռուստաընկերություն Հայաստանում այլևս եթեր չի հեռարձակվելու:
Սակայն նրանց ծրագրերը ձախողեց «ԳԱԼԱ» հեռուստաընկերությունը, որը 2008թ. նախագահական ընտրություններին նախորդող շրջանում ազատ գործելու հայտ ներկայացրեց: Հասկանալի է, որ նման վարքագիծը որևէ կերպ չէր կարող տեղավորվել ՀՀ իշխանությունների տրամաբանության ու ծրագրերի շրջանակներում: 2007 թվականից սկսած իշխանությունները, օգտագործելով իրեց ձեռքում եղած հնարավոր բոլոր լծակները, անում էին ամեն ինչ, որպեսզի «ԳԱԼԱ» հեռուստաընկերությունը եթերում չլինի:
Ի հեճուկս իշխանական ցանկությունների, իրականացվող ապօրինի ճնշումների ու հետապնդումների, շինծու դատավարությունների ու մտացածին հսկայական տուգանքների «ԳԱԼԱ»-ն շարունակեց մնալ եթերում:
Այսօր, նոր ընտրությունների նախաշեմին, իշխանությունները հեռուստաընկերությանը եթերազրկելու նոր միջոց են մտածել՝ապամոնտաժել ընկերության հեռարձակող սարքավորումները: Լրատվամիջոցների դեմ իշխանությունների տաս և ավել տարիներ առաջ սկսած ու չդադարող, գնալով էլ ավելի սաստկացող արշավը ընդամենը մեկ նպատակ ունի՝ սահմանափակել երկրում ազատ խոսքը և «անաղմուկ» ու «անցնցում» դարձնել կեղծված ընտրությունների միջոցով սեփական վերարտադրությունը:
«Իրավունքի և ազատության կենտրոն» հ/կ դատապարտելով խոսքի ու մամուլի ազատության դեմ ուղղված ՀՀ իշխանությունների յուրաքանչյուր ոտնձգություն իր աջակցությունն է հայտնում «ԳԱԼԱ» հեռուստաընկերությանը: Վստահ ենք, որ մեր համատեղ ջանքերով հնարավոր կլինի Հայաստանում կասեցնել տոտալիտարիզմի հաղթարշավը:
Իրավունքի և ազատության կենտրոն հ/կ նախագահ իրավապաշտպան՝
Վարդան Հարությունյան
