Հունվարի 31-ին հրավիրված ԵՊՀ հոգաբարձուների խորհրդի նիստի օրակարգում էր նաև ռեկտորի թափուր պաշտոնը զբաղեցնելու համար մրցույթ հայտարարելու հարցը: ԵՊՀ հոգաբարձուների խորհուրդը որոշում կայացրեց, որ ԵՊՀ ռեկտորի անունը հայտնի կդառնա մարտի 23-ին:
Շրջանառվում են երկու թեկնածուների անուններ՝ արևելագիտության ֆակուլտետի դեկան Ռուբեն Մելքոնյանի և իրավաբանական ֆակուլտետի ամբիոնի վարիչ Վահե Հովհաննիսյանի անունները: Թեմայի շուրջ զրուցելու համար «Առաջին լրատվական»-ը հյուրընկալել է ԵՊՀ ֆինանսավարկային ամբիոնի վարիչ, տնտեսագիտության դոկտոր, պրոֆեսոր Հայկ Մնացականյանին, իրավաբանական գիտությունների թեկնածու, ԵՊՀ դոցենտ Տաթևիկ Դավթյանին և ԵՊՀ պատմական գիտությունների թեկնածու, դոցենտ Մենուա Սողոմոնյանին:
Ինչպես նշեց Հայկ Մնացականյանը՝ ԵՊՀ-ում խնդիրները բազմաթիվ են, բայց հիմնական խնդիրը ձևակերպում է պետությունը և հասարակությունը, այն է՝ որակյալ կրթության և որակյալ մասնագետների ապահովումը. «Եվ մեր նախաձեռնությունը և քայլերը միտված են այդ խնդրի լուծմանը»:
Ինչ վերաբերում է ռեկտորի թեկնածուներին՝ Մենուա Սողոմոնյանը նշեց, որ պետք է սպասել մինչև մարտի 7-ը՝ գործերի ներկայացման վերջնաժամկետը. «Շրջանառվում է նաև կիրառական մաթեմատիկայի ֆակուլտետի դեկան Վահրամ Դումանյանի անունը: Իսկ աջակցության մեր մոդելն այն է, որ լիդերը առաջինը լինի հավասարների մեջ: Վահե Հովհաննիսյանը եղել է մեր հարթակում: Նա, չնայած երիտասարդ տարիքին, բավական լուրջ փորձառություն ունի»:
Հայկ Մնացականյանն էլ կարծում է, որ մեկ անձը չի կարող լուծել համալսարանի խնդիրները. «Այստեղ պետք է լուրջ թիմային աշխատանք, այսինքն՝ մարդիկ, որոնք իրենց առջև նպատակ են դրել զարգացնել համալսարանը, զարգացնել կրթությունը: Եվ մեր նախաձեռնությունը շահեկան դիրքում է, որովհետև այն թարմություն ու նոր ավյուն է փորձում մտցնել այս ամբողջ պրոցեսների մեջ»:
Հարցազրույցն ամբողջությամբ՝ տեսանյութում:
