Առաջնորդվելով Սահմանադրության 206-րդ հոդվածով՝ ՀՀ նախագահ Արմեն Սարգսյանը ստորագրել է Սահմանադրության փոփոխությունների հանրաքվեն ապրիլի 5-ին անցկացնելու վերաբերյալ հրամանագիրը:
Թեմայի շուրջ «Առաջին լրատվական»-ը զրուցել է արձակագիր Գևորգ Տեր-Գաբրիելյանի հետ:
Հեղափոխական շարժումները հաճախ նաև կորուսյալ հնարավորությունների պատմական անցքեր են. Սահմանադրական դատարանի շուրջ ստեղծված ճգնաժամը դիտարկենք հենց այս դիտանկյունից: Իշխանությանը հաճախ մեղադրում են, որ կարող էին «երկաթը տաք-տաք ծեծել» և սահմանադրական ճգնաժամը վաղուց լուծել: Սակայն իշխանությունը չգնաց այս ճանապարհով: Անդրադառնալով այս դիտարկմանը և հարցին, թե ինչու իշխանությունն ընտրեց հանրաքվեի ճանապարհը, Գևորգ Տեր-Գաբրիելյանը նշեց. «Նիկոլ Փաշինյանը հայտարարել էր ոչ բռնի մոտեցման մասին և նշել, որ չի լինելու կադրային ջարդ, օրինապաշտ երկիր ենք կառուցելու, և փորձում էր օրենքն աշխատեցնել… Եվ կամաց-կամաց համոզվում էր, որ մեր օրենքները չեն աշխատում, և միֆը, որ օրենքները լավն են, բայց կոռուպցիա կա, դրա համար լավ չեն աշխատում, իրականում այդպես չէ: Մեր օրենքները ստեղծված են այնպես, որ ոչ մի պարագայում չաշխատեն: Մեր օրենքներն անիրագործելի են բոլոր ասպարեզներում, ենթաօրենսդրական ակտերը, գերատեսչությունների միջև հարաբերությունների կանոնները և այլն, այնպես են ստեղծված, որ էֆեկտիվ չլինեն: Եվ դա հասկանալի է, որովհետև եթե ձևի համար, արտասահմանի աչքին լավ ներկայանալու համար իբրև թե լավ օրենք ես գրում, դա լավ օրենք չի կարող լինել, որովհետև լավ օրենքը հիմնված է պրակտիկաների վրա»:
«Ես շատ ուրախ եմ, որ մեր երկրում տեղի ունեցած հեղափոխությունը չտարավ դեպի բռնություն: Եթե նույնիսկ ամենասխալ օրենքների նկատմամբ չլիներ Ն. Փաշինյանի և նրա քաղաքական թիմի հսկայական հարգանքը, ապա երկիրը կամաց-կամաց կգնար քաոսի»,- ընդգծեց Տեր-Գաբրիելյանը:
Մեր զրուցակիցը նաև կարծիք հայտնեց, որ հանրաքվեն Հայաստանի զարգացման հարցում հսկայական դեր է ունենալու, անգամ եթե «Այո»-ն չհաղթի. «Փակուղին քանդելու այս ձևը, որն առաջարկել է մեր Ազագյին ժողովը և իշխող ուժը, շատ ճիշտ է»:
Մանրամասն՝ տեսանյութում:
