Բելառուսի իշխանությունները որոշել են բարելավել պետական զինանշանը, որը գոյություն ունի 1995 թ.-ից ի վեր:
Առավել ուշագրավ փոփոխություններից մեկը վերաբերում է «Բելառուսի Հանրապետություն» բառերի վրա նկարված գլոբուսին: Առկա զինանշանի վրա Բելառուսը պատկերված է Ռուսաստանի տարածքի մեծ մասի հետ, իսկ նոր տարբերակում՝ գերակշռում են Եվրոպայի երկրները:
Բելառուսի արդարադատության նախարար Օլեգ Սլիժևսկին բացատրել է, որ նոր զինանշանի վրա մայրցամաքների պատկերներն ավելի հստակ կլինեն և աշխարհագրորեն ավելի ճշգրիտ: Նախարարը նշել է, որ այժմ զինանշանի վրա «նրբություններ կան, որոնք միշտ չէ, որ ճիշտ ասոցիացիաներ են առաջացնում»՝ չհստակեցնելով, թե ինչի մասին է խոսքը:
Բացի զինանշանի վրա պատկերված գլոբուսից, առաջարկվում է փոխել նաև կարմիր աստղի պատկերը, որպեսզի այն ավելի պակաս ռազմատենչ տեսք ունենա: Կփոխվեն նաև ծաղիկների նկարները. երեքնուկն ու կտավատը կդառնան ավելի ծավալուն, իսկ երկրի ուրվագիծը կլինի ոսկեգույն՝ կանաչի փոխարեն: