Լուրեր
Հրայր Թովմասյանը չի գնա խարակիրիի և մինչև հանրաքվեն Քոչարյանի գործով որևէ որոշում չի կայացնի
  • 18:00
  • 2020-02-13
  • Դիտումներ՝ *

Նախօրեին Երևանի ընդհանուր իրավասության դատարանում շարունակվում էր Ռոբերտ Քոչարյանի և մյուսների գործով դատական նիստը: Այդ նիստի ժամանակ դատարանը որոշեց սանկցիա կիրառել Ռոբերտ Քոչարյանի և Արմեն Գևորգյանի պաշտպանների նկատմամբ։

Ի՞նչ եք կարծում՝ ինչո՞ւ բանը հասավ սանկցիաների կիրառմանը․ «Առաջին լրատվական»-ի հարցին փաստաբան Արա Ղարագյոզյանը պատասխանեց․ «Այդ դատավարությունը չի գնում առաջ, և բնական է իմ գործընկերոջ՝ Սեդա Սաֆարյանի դիրքորոշումը, որ փաստաբանը նաև մարդ է ու ներվերին տեղիք է տալիս։ Բայց, ամեն դեպքում՝ այս դատավարությունը, եթե այս տեմպերով գնա, ապա այս գործն ավարտին չի հասցվի։ Մենք տեսնում ենք, որ Ռոբերտ Քոչարյանի պաշտպանական թիմը, մեկը մյուսին լրացնելով՝ առնվազն չորս օր նրանք խոսեցին քրեական հետապնդումը դադարեցնելու շուրջ։ Այսինքն՝ նրանք ռեսուրսի պակաս չունեն։ Անընդհատ նույն բանը տարբեր ձևերով կրկնելով կամ մի նախադասություն ավելացնելով՝ ձգձգում են դատավարության պրոցեսը։ Դա պետք է ինչ-որ ձև դատարանի կողմից սահմանափակվի։ Մենք տեսնում ենք՝ նախագահող դատավորն ամեն ինչ անում է, որ Ռոբերտ Քոչարյանի պաշտպանական թիմին թույլ տա, որպեսզի այդ գործընթացներն իրականացվեն, և գործը դատաքննություն չմտնի։ Մենք, որպես տուժող կողմ, միշտ փորձել ենք ըմբռնումով մոտենալ դատավորի գործողություններին, բայց չի կարելի այս պրոցեսն անվերջ երկարացնել։ Քրեական օրենսդրությամբ նման կարգ նախատեսված չէ »։

Իսկ ՀԱԿ իրավական հանձնաժողովի ներկայացուցիչ Արմեն Խաչատրյանն ասաց․ «Նախ՝ մենք պետք է հասկանանք, թե ինչ քրեական գործի մասին է խոսքը, թե ինչ քրեական գործի հետ ենք առնչվում։ Ակնհայտ է, թե ինչ են ուզում անել Ռոբերտ Քոչարյանի փաստաբանները։ Նրանց այն ակնարկները, որ ահա սա բավարարելուց հետո դուք գիտեք՝ կներկայացնենք սա, դրանք դատարանի նկատմամբ բացահայտ ճնշումներ են, և այս ամենն արժանի էր, որ դատարանը սանկցիա կիրառի։ Մյուս կողմից՝ այս իրադարձությունները ես կկապեի մեր երկրում տեղի ունեցող շատ հնչեղ իրադարձության հետ։ Մենք բազմաթիվ անգամ ասել ենք, որ Սահմանադրական դատարանը, Հրայր Թովմասյանի գլխավորությամբ, հանդիսանում է Ռոբերտ Քոչարյանի վերջին Բաստիոնը»։

 

 

 

Մանրամասները՝ տեսանյութում։

  • Դիտումներ՝ *