Իշխող կոալիցիայի կազմած աշխատանքային խմբի և Հայ ազգային կոնգրեսի ձևավորած պատվիրակության անդամների միջև կայացած առաջին հանդիպման ավարտին Հայ ազգային կոնգրեսի ներկայացուցիչ Դավիթ Շահնազարյանը լրագրողներին հայտնեց, որ կոալիցիայի ներկայացուցիչները հայտարարել են, որ իրենց լիազորությունները ավելի շատ են, քան մինչ այդ էր հայտնի. «Երկրորդը` մեր գործընկերները հայտարարեցին, որ պատրաստ են քննարկել ցանկացած հարց և չկան այնպիսի հարցեր, որոնք քննարկման ենթակա չեն: Մենք ներկայացրեցինք մեր տեսակետը, նրանք` իրենց տեսակետները, և ըստ էության ավարտվեց: Քննարկում՝ որպես այդպիսին, տեղի չունեցավ:
Դ.Շահնազարյանը փոքր-ինչ մանրամասնեց. «Մենք ներկայացրել ենք մեր տեսակետները. այն, որ մենք քաղաքական այս խորը ճգնաժամից միակ ելքը տեսնում ենք նախագահական և խորհրդարանական ընտրությունների անցկացման մեջ, ինչպես նաև, որ մինչև սեպտեմբեր այդ հարցերը այսպես, թե այնպես պետք է հստակեցվեն: Նրանք հարցերով ճշգրտեցին մեր դիրքորոշումը: Իրենք ներկայացրեցին, ճշգրտեցին իրենց դիրքորոշումը, բայց որևէ դիրքորոշման վերաբերյալ քննարկումներ դեռևս չեն եղել»,- նշեց նա` հավելելով. «Ինչպես մենք հայտարարել ենք` մեր հիմնական խնդիրը արտահերթ ընտրություններով այս քաղաքական ճգնաժամի հաղթահարումն է»:
Հարցին, թե գո՞հ են քննարկումից` Դավիթ Շահնազարյանը նշեց. «Ես կարծում եմ, որ որոշակի արդյունքներ կան, և չեմ բացառում ու կարծում եմ, որ սա կարող է նաև շարունակություն ունենալ»:
«Առաջին լրատվականի» հարցին՝ փաստորեն Դավիթ Հարությունյանը քննարկման ավարտին լրագրողներին հայտնեց, որ իրենք ներկայացնում են նաև Սերժ Սարգսյանին, հետևաբար կարելի՞ է համարել, որ Հայ ազգային կոնգրեսի պահանջը կատարված է, Դավիթ Շահնազարյանը պատասխանեց. «Ես հիմա չէի ուզենա մեկնաբանել, որովհետև այդ հայտարարությունը արել է Դավիթ Հարությունյանը: Մենք կծանոթանանք իրենց հայտարարությանը մամուլից, որից հետո կտանք մեր պատասխանը»: