Ադրբեջանի նախագահ Իլհամ Ալիևը Բաքվում Թուրքիայի արտգործնախարարության պատվիրակության հետ հանդիպմանը, որը ղեկավարում է նախարար Մևլութ Չավուշօղլուն, բողոքել է ԵԽԽՎ-ի կողմից Ադրբեջանում քաղբանտարկյալների վերաբերյալ բանաձևի ընդունումից:
Ըստ Ալիևի՝ Ադրբեջանում քաղբանտարկյալներ չկան, բայց նրանք կան այլ երկրներում, և ԵԽ-ն դրան ուշադրություն չի դարձնում: Որպես օրինակ նա նշել է Հայաստանի նախկին նախագահ Ռոբերտ Քոչարյանի հանդեպ հարուցված քրեական գործերը:
«Կարող եմ բերել Հայաստանի օրինակը: Հայաստանի նախկին նախագահը մեկ տարուց ավելի է՝ ձերբակալված է: Նա ձերբակալվեց այն բանից հետո, երբ հայտարարեց, որ ցանկանում է վերադառնալ քաղաքականություն, և արդեն մեկ տարուց ավելի է՝ բանտում է։ Հետաքննություն է տարվում նաև Հայաստանի երկու տարի առաջվա նախագահ Սերժ Սարգսյանի նկատմամբ։ Նրա նկատմամբ նույնպես հարուցվել է քրգործ, և, լրատվական դաշտում տարածված տեղեկությունների համաձայն, նրա գործը դատարանում է։ Հիմնական պատճառն այն է, որ նախկին նախագահները քննադատել են ներկա իշխանություններին»,- ասել է Ադրբեջանի նախագահը։