Արմավիր-Երևան մայրուղու վրա այսօր բողոքի դուրս եկած մահացած զինծառայողի հարազատների և ոստիկանների միջև բախումներ են տեղի ունեցել։ Արցախում` զորամասի հրաձգարանում հունվարի 30-ին մահացած զինծառայող Վահրամ Ավագյանի հարազատները չեն հավատում մահվան պաշտոնական` ինքնասպանության վարկածին: Կրքերը մեղմելու համար մահացած զինվորի բնակավայր է մեկնել ՊՆ նախարար Դավիթ Տոնոյանը, որը Վահրամ Ավագյանի հարազատներին խոստացել է անաչառ քննություն՝ ասելով, որ տեղի ունեցածն ինքանսպանություն չէ։ Ի դեպ, բոլոր հիմքերը կան ենթադրելու, որ հանրային ճնշման արդյունքում քննությունն այս պահին կանգ է առել սապնության վարկածի վրա, կան երեք ձերբակալվածներ, որոնց թվում է նաև Վահրամ Ավագյանի ծառայակիցներից մեկը՝ տխրահռչակ Շմայս մականունով հայտնի ԱԺ նախկին պատգամավոր Առաքել Մովսիսյանի որդին։
Կոնկրետ դեպքով հարազատների, գյուղի հասարակության ընդվզումը գուցե տվեց իր արդյունքերը, ու բոլորս կոնկրետ տեղեկատվություն ստացանք կատարվածի մասին, սակայն խնդիրն ավելի խորքային է։
Հունվարի 10-ին ՀՀ վարչապետ Նիկոլ Փաշինյանը հայտնել էր, որ 2019 թվականի ընթացքում Հայոց բանակում (բոլոր պատճառներով) զոհերի քանակի պատմական մինիմում է արձանագրվել: «Այսինքն՝ մեր բանակում երբեք ավելի քիչ զոհ չի եղել, քան 2019 թվականին»,- հայտնել էր ՀՀ վարչապետը: Սակայն վարչապետի հայտարարությունից հետո անվերահսկելի իրավիճակ է ստեղծվել ՀՀ զինված ուժերում, և դեպքերը մեկը մյուսին հաջորդում են:
Մասնավորապես, հունվարի 23-ին՝ 06:55-ի սահմաններում, ՊԲ հյուսիսային ուղղությամբ տեղակայված զորամասերից մեկում հրազենային վիրավորում էին ստացել ՊԲ զինծառայողներ 2001թ. ծնված Հենրի-Հայկ Սիմոնի Զաքարեանը եւ 2000թ. ծնված Արմեն Մեսրոպյանը:
Իսկ բանակի օրը՝ հունվարի 28-ին՝ ժամը 2:55-ի սահմաններում, ՊԲ հարավարևելյան ուղղությամբ տեղակայված զորամասերից մեկի պահպանության տեղամասում հրազենային վիրավորում է ստացել 20-ամյա զինծառայող Նվեր Ավետիսյանը: Հոինվարի 30-ի դեպքը փաստորեն երրորդն է հունվար ամսին։
Սա իրապես աղետ է, որը փաստում է նաև, որ բանակում իրավիճակը, մեղմ ասած, չի վերահսկվում ու այս համատեքստում իրապես տարօրինակ է, որ օրեր առաջ ՌՈ պետն արժանանում է գեներալական ուսադիրների։
Բանակում տեղի ունեցող բարեփոխումները որևէ մեկս կասկածի տակ չի դնում, սակայն ակնհայտ է, որ զինված ուժերում դարձյալ պահպանվում են հանցավոր բարքերը, ինչի հետևանքով մենք խաղաղ պայմաններում կորցնում ենք զինվորներ՝ սպանությունների կամ ինքնասպանությունների հետևանքով։ Սա իրական աղետ է, ինքնաոչնչացման ռեժիմ, որը զրոյացնում է բանակում տեղի ունեցող բոլոր բարեփոխումները։ Երևի ժամանակն է, որպեսզի բանակի որոշ բարձրաստիճան պաշտոնյաներ զրկվեն իրենց պաշտոններից, ուսադիրներից։ Հակառակ պարագայում՝ այնպիսի տպավորություն է, որ ոմանք սաբոտաժ են իրականացնում երկրի իշխանության, վարչապետի դեմ։
Մյուս կարևոր հանգամանքն այն է, որ բացահայտվեն բանակում տեղի ուենցած բոլոր նմանտիպ հանցագործությունները, այդ թվում՝ նախկինում կատարված։ Յուրաքանչյուր չբացահայտված կամ քողարկված հանցագործություն ծնում է անպատժելիություն, նոր հանցագործություն, նոր մահ, ինչը սասանում է հասարակության հավատը պետության ու բանակի հանդեպ։ Ինքնաոչնչացման ընթացքը պետք է կասեցնել։
Լուսանկարները՝ forrights.am-ի