Գրանցվել է 2019-nCoV կորոնավիրուսից մահվան առաջին դեպքը Չինաստանի սահմաններից դուրս՝ Ֆիլիպիններում: Այս մասին հաղորդել է Առողջապահության համաշխարհային կազմակերպության ֆիլիպինյան մասնաճյուղը Twitter-ում:
«44 տարեկան տղամարդը Ֆիլիպիններում 2019-nCoV կորոնավիրուսով երկրորդ հաստատված հիվանդն է»,- ասվում է հաղորդագրության մեջ: Նշվում է, որ նա մահացել է փետրվարի 1-ին:
2019-nCoV կորոնավիրուսը առաջին անգամ գրանցվել է չինական Ուհան քաղաքում 2019թ. դեկտեմբերին: Այս տարվա հունվարի վերջին այս քաղաքը, ինչպես նաև հարևան բնակավայրերը փակվել են ինֆեկցիայի բռնկման պատճառով:
Փետրվարի 2-ի տվյալներով՝ չինական կորոնավիրուսից մահացածների ընդհանուր թիվը գերազանցել է 300-ը, վարակվածների թիվը ավելացել է մինչև 14 380, ամբողջովին բուժվել է 328 մարդ: Բացի Չինաստանից, հիվանդությունը գրանցվել է ևս 23 երկրում, այդ թվում՝ Ռուսաստանում: Առողջապահության համաշխարհային կազմակերպությունը կորոնավիրուսի բռնկումը անվանել է միջազգային մասշտաբի արտակարգ իրավիճակ:
