Ճապոնացի գիտնականները ֆերմենտացված սոյայից պատրաստված մթերքների օգտագործումը համարում են վաղաժամ մահից խուսափելու արդյունավետ միջոցներ: Այս մասին ասվում է MedicalXpress-ի հաղորդագրության մեջ:
Մասնագետները վերլուծել են հետազոտության արդյունքները, որին մասնակցել են 45-74 տարեկան 42 750 տղամարդ և 50 165 կին: Կամավորները լրացրել են թերթիկներ՝ ցույց տալով դիետայի սովորությունները, կենսակերպը և առողջական վիճակը: Դիտարկման ընթացքը տևել է գրեթե 15 տարի, և այդ ընթացքում նշվել են մահվան բոլոր դեպքերը:
Պարզվել է, որ ֆերմենտացված սոյան 10 տոկոսով նվազեցրել է վաղաժամ մահվան հավանականությունը, սակայն սոյայով պատրաստված մթերքների ընդհանուր օգտագործումը ոչ մի կերպ չի ազդել այդ ցուցանիշի վրա: Կանայք և տղամարդիկ, ովքեր կերել են ֆերմենտացված սոյայից պատրաստված մթերքներ, ինչպիսին է, օրինակ, միսոն, ավելի քիչ են տառապել սիրտ-անոթային հիվանդություններով: Միաժամանակ սոյան ոչ մի արդյունավետություն չի ունեցել քաղցկեղի զարգացման ռիսկի վրա:
