Հունվարի 31-ին հայտնի դարձավ, որ վարչապետ Նիկոլ Փաշինյանը Հոկտեմբերի 27-ի ոճրագործության պարագլուխ Նաիրի Հունանյանի՝ իրեն ուղարկված նամակը հասցեագրել է ՀՀ գլխավոր դատախազություն, վերջինս էլ իր հերթին՝ Ազգային անվտանգության ծառայություն՝ Հոկտեմբերի 27-ի անջատված մասով քննությանը ներգրավելու համար։
Ուշագրավ է, որ այս օրերին գլխավոր դատախազից Հոկտեմբերի 27-ին Ազգային ժողովում սպանված ԱԺ նախագահի տեղակալ Յուրի Բախշյանի այրին՝ Անահիտ Բախշյանը, ստացել է բաց նամակի պատասխանը, ինչպես նաև մեկ այլ միջնորդության պատասխանը, որով առաջարկում էր քննչական խմբի ենթակայությունը ԱԱԾ-ից հանել, տալ ՀՔԾ-ին։
Հիշեցնենք, որ Անահիտ Բախշյանը, հունվարի կեսերին դիմել էր դատախազություն առաջարկով՝ Հոկտեմբերի 27-ի գործի վերաբացումից հետո քննող մարմնին տուժողի իրավահաջորդ հայտարարել Հայաստանի Հանրապետությունը՝ ի դեմս ՀՀ Ազգային ժողովի և ՀՀ կառավարության։
Բախշյանն առաջարկում էր վերաբացված գործը հանձնարարել այդ նպատակով ստեղծված հատուկ քննչական այն խմբին, որի մեջ կներառվեն ՀՀ-ում առկա ամենապրոֆեսիոնալ քննիչներ (ներառյալ ԱԱԾ քննիչներ), որոնք ունեն անբասիր աշխատանքային կենսագրություն և բարձրագույն ակնածանք իրենց ուսադիրի նկատմամբ, որոնց համար Հայաստանի պետական անվտանգությունն ապահովելը պատվի խնդիր է, իսկ դրանց կրկնությունը բացառելը՝ կյանքի խնդիր։
1999թ․ հոկտեմբերի 27-ին տուժած ՀՀ ներքին գործերի նախկին նախարար Սուրեն Աբրահամյանը «Առաջին լրատվական»-ի հետ զրույցում կարծում է, որ Հոկտեմբերի 27-ի ոճրագործությունը պայմանավորված է եղել ԱԱԾ-ի բացթողումների պատճառով, ուստի նույնիսկ ներկա իշխանությունների հատու, հստակ քաղաքական կամքի պարագայում անընդունելի է այդ գործի քննությունը վստահել նրան։
«Այն քննչական որակների, քննիչների մասին, որ հայտարարում է Անահիտ Բախշյանը, նախկինում էլ են եղել, հիմա էլ կան։ Կան բարձր կարգի քննիչներ, բայց դրա հետ մեկտեղ նրանք չեն կարող առանց ԱԱԾ-ի որոշակի ծառայությունների, օգնության այդ գործը բացահայտել։ ԱԱԾ-ում կան իրավիճակի գնահատման հատուկ վերլուծաբաններ, որոնք վերլուծում են աշխարհաքաղաքական գործընթացները, ներքին, քաղաքական մարտահրավերները։ Հատուկ քննչական խումբը, կարծում եմ, որ պետք է գործի նրանց օգնությամբ և լինի ՀՀ գլխավոր դատախազությանը ընդդատյա։ Խումբը պետք է ստեղծվի ՀՀ վարչապետի հրամանով և ընդդատյա լինի գլխավոր դատախազին։ Ազգային անվտանգության որոշ ծառայություններ էլ պետք է անվերապահ օգնեն, օժանդակեն, քանի որ նրանք տիրապետում են ամբողջական տեղեկատվության, և առանց նրանց օգնության հնարավոր չէ այդ գործը բացահայտել»,- ասաց Սուրեն Աբրահամյանը։
