ՀՀ երրորդ նախագահ Սերժ Սարգսյանը հունվարի 28-ին Եռաբլուրում անդրադարձել է վարչապետ Նիկոլ Փաշինյանի արցախյան բանակցային գործընթացում ստացած ժառանգության մասին հայտարարությանը՝ 7 շրջանների հանձնման վերաբերյալ, և նշել, որ չի ցանկանում այս լուսավոր օրն անդրադառնալ հերյուրանքներին։
Ստացվում է՝ Սերժ Սարգսյանը հերյուրանք է համարում այն, ինչ ասել է Նիկոլ Փաշինյանը՝ ներկայացնելով դա որպես Արցախի հարցում Սերժ Սարգսյանի թողած ժառանգություն: Իսկ ի՞նչ ժառանգություն է թողել Սերժ Սարգսյանն այդ դեպքում, երբ այն, ինչ ասում է Փաշինյանը, համարում է հերյուրանք: Եվ եթե դա չէր ժառանգությունը, ինչո՞ւ ապրիլյան պատերազմից անմիջապես հետո իր հայտնի հարցազրույցում Սերժ Սարգսյանը խոսեց հենց այդ բովանդակությամբ ժառանգության մասին՝ ասելով, որ Հայաստանը պատրաստ է եղել ստորագրել փաստաթուղթ, որը, սակայն, Ադրբեջանի կողմից մերժվել է։
Քաղաքագետ, ՌԱՀՀԿ տնօրեն Մանվել Սարգսյանն «Առաջին լրատվական»-ի հետ զրույցում անդրադառնալով Սերժ Սարգսյանի հայտարարությանն այն մասին, թե հերյուրանք է, որ ինքն արցախյան բանակցային գործընթացում ժառանգություն է թողել 7 տարածքների հանձնումը, ասաց. «Սերժ Սարգսյանը չէ՞ր տարել Կազանյան փաստաթուղթ ստորագրելու, որ Ադրբեջանն էլ հրաժարվել է։ Կարծեմ այդ փաստաթուղթը հրապարակվել է, ու այնտեղ պարզ գրված է, թե ինչ է նախատեսում կարգավորման այդ տարբերակը։ Անցած բան է, ու հիմա ինչ ասես՝ կարող են ասել, հերքել։ Կոնկրետ փաստաթուղթ է, թող հրապարակվի, ու մարդիկ համոզվեն, թե ինչի շուրջ են ընթացել բանակցությունները։ Ադրբեջանն էլ հետո պահանջել է 9 թե 10 դրույթ փոխել, չի ստորագրել, թողել-գնացել է»։
Ըստ մեր զրուցակցի՝ Փաշինյանն իշխանության գալուց հետո որոշ հարցեր է բարձրացրել, որի շուրջն ակնկալում է պատասխան Մինսկի խմբի համանախագահների ու Ադրբեջանի կողմից. «Բայց դրան զարգացումներ չհաջորդեցին, որովհետև չհնչեցին նաև պատասխաններ։ Շատ կոնկրետ հարցեր էին, որոնց պետք է պատասխաններ տրվեին Մինսկի խմբի համանախագահների ու Բաքվի կողմից, բայց դա չեղավ։ Եվ հենց այդ պատճառով էլ ամեն ինչ օդում կախված է մնացել։ Գուցե արտգործնախարարների հանդիպումից հետո ինչ-որ բան պարզ կլինի»։
Այն, որ նախկին իշխանությունները տարիներով բանակցել են տարածքներ հանձնելու շուրջ, իսկ այժմ առանց որևէ հիմնավորման նոր իշխանություններին, մասնավորապես վարչապետ Փաշինյանին են մեղադրում հող հանձնելու, բանակցային գործընթացը տապալելու մեջ, Մանվել Սարգսյանն արտառոց չի համարում. «Բա ուրիշ ի՞նչ պետք է անեն, օդում պետք է խոսեն, մեղադրեն։ Տարիուկես, համարյա երկու տարի է՝ խոսում են, հորինում, բայց դրանք իրականության հետ աղերս չունեն։ Ի վերջո Հանրապետական կուսակցության պաշտոնավարման օրոք է իրավիճակը հասունացել պատերազմի՝ 2014-2017 թվականներին պատերազմական իրավիճակ էր։ Իրենք դրա պատասխանատվության տակից ուզում են դուրս գալ, ու բնական է, որ պետք է նման բաներ խոսեն»։