Կառավարությունն այսօրվա նիստում հաստատեց Սերբիայի Հանրապետության քաղաքացիների համար առանց մուտքի վիզայի այցելությունների ռեժիմ սահմանելու մասին կառավարության որոշման նախագիծը։
Արտաքին գործերի նախարարի տեղակալ Ավետ Ադոնցն ասաց, որ 2019 թվականի հոկտեմբերի 25-ին Սերբիայի կառավարությունը որոշում է ընդունել սովորական անձնագիր կրող ՀՀ քաղաքացիների համար մուտքի արտոնագրի պահանջը միակողմանի վերացնելու մասին, որն արդեն ուժի մեջ է մտել։
«Դրա արդյունքում ՀՀ քաղաքացիները կարող են Սերբիայի Հանրապետության տարածքում առանց մուտքի արտոնագրի պահանջի մնալ առավելագույնը 90 օր ժամկետով՝ մեկ տարվա համար 180 օր։ Պահպանելով փոխադարձության սկզբունքը՝ մշակվել է այս որոշման նախագիծը, որի ընդունման արդյունքում Սերբիայի քաղաքացիները ՀՀ տարածքում կարող են գտնվել առավելագույնը 180 օր ժամկետով՝ մեկ տարվա ընթացքում»,- ասաց Ադոնցը։
Վարչապետ Նիկոլ Փաշինյանն ասաց, որ սա կարևոր որոշում է։ «Եվ հույս ունեմ, որ այս որոշումը կխթանի նաև, որպեսզի ուղիղ չվերթներ իրականացվեն Երևանից Բելգրադ և Սերբիայի այլ քաղաքներ, Գյումրիից Բելգրադ և այլ քաղաքներ։ Եվ ընդհանրապես այս միտումը՝ տարբեր երկրների հետ իրականացնել առանց վիզային ռեժիմի գործընթաց, կնպաստի մեր արտաքին քաղաքականությանը»,- ասաց վարչապետը։
Կառավարության նիստում նշվեց, որ Հայաստանը 63 երկրների հետ ունի առանց վիզայի ռեժիմ։
