Երեկվանից որոշ հայկական և նույնիսկ ռուսական լրատվամիջոցներում տեղեկություններ են շրջանառվում, որ, իբր, ՀՀ վարչապետ Նիկոլ Փաշինյանը բուժման կուրս է անցնում Երևանի նեվրոզների կլինիկայում:
Այս տեղեկության աղբյուրի որոնումների հետքերը բերել են ոմն ֆեյսբուքյան օգտատեր Նիկոլայ Տեր-Հալաբյանին, որն ակնհայտորեն ֆեյք է: Լուրը հրապարակել է Master Pera Telegram-ալիքը, որին և հղում են անում բազմաթիվ այլ լրատվամիջոցներ, մասնավորապես, ռուսական «Նովիե Վեդոմոստի» պարբերականը և հայկական News.am և Aysor.am պորտալները:
Հարցի վերաբերյալ մեկնաբանություն ստանալու համար «Ինֆոտեկա 24»-ը կապ է հաստատել կլինիկայի տնօրեն Ցոլակ Հակոբյանի հետ:
«Ես պաշտոնապես հայտարարում եմ, որ ոչ Նիկոլ Փաշինյանը, ոչ էլ նրա ընտանիքի որևէ անդամ երբևէ չեն դիմել ինձ մասնագիտական օգնության համար»,- հայտարարել է Հակոբյանը: Ավելին, նա տվյալ պահին Հայաստանում չէ:
Կլինիկայի տնօրենի խոսքերով, ցանցում տարածված տեղեկատվությունը նենգ սուտ է և զրպարտություն:
Ակնհայտ է, որ այս ապատեղեկատվությունը հակահեղափոխության հերթական փորձ է՝ ՀՀ կառավարության գործող ղեկավարին վարկաբեկելու միջոցով: Նմանատիպ փորձեր բազմիցս եղել են: Ինչպես արդեն պարզվել է, Փաշինյանների ընտանիքի դեմ տարվող տեղեկատվական պատերազմի հետևում կանգնած են նախկին իշխանության անդամները, որոնց հովանու ներքո շարունակում են գործել որոշ տեղեկատվական ռեսուրսներ, այդ թվում վերոնշյալ կայքերը:
Նախկինների ձեռքում գործիք է նաև ԱԱԾ նախկին տնօրեն Արթուր Վանեցյանը, որը կարողացել էր բավականին մտերիմ հարաբերություններ հաստատել վարչապետի և նրա ընտանիքի հետ:
Ստորև ներկայացնում ենք Նեվրոզների կլինիկայի տնօրեն Ցոլակ Հակոբյանի հետ հեռախոսազրույցի ամբողջական ձայնագրությունը: