Աֆղանստանի Ղազնիի նահանգում հունվարի 27-ին կործանված մարդատար ինքնաթիռը կարող էր պատկանել օտարերկրյա ավիաընկերության: Այդ մասին, ինչպես հայտնել է Աֆղանստանի 1TVNews հեռուստաալիքը, հայտարարել են տեղի իշխանությունները՝ տեղեկացնում է TASS-ը: Ղազնիի նահանգապետ Վահիդուլլա Քալիմզայի խոսքով՝ «ինքնաթիռը չի պատկանել հայրենական որևէ ընկերության»:
«Ըստ երևույթին, խոսքը վերաբերում է օտարերկրյա փոխադրողի,- նշել է նա:- Ինքնաթիռն ամբողջովին այրվել է»:
Մինչ այժմ ստույգ տեղեկատվություն չկա աղետի ենթարկված ինքնաթիռի մասին: Օդանավն ընկել է երկրի կենտրոնական մասում՝ «Թալիբան» արմատական շարժման վերահսկողության տակ գտնվող Դիհ Յաքի գավառում:
Այժմ դեպի այդ վայր են շարժվում աֆղանական հատուկ նշանակության ուժերը: Սկզբնապես տեղեկացվել էր, որ օդանավը պատկանում է Ariana Afghan Airlines ավիաընկերությանը, բայց ազգային ավիափոխադրողը հերքել է այդ տեղեկատվությունը: