Իրանի նախագահ Հասան Ռոհանին հայտարարել է, որ իր երկիրը չի ընկել միջուկային զենքի հետևից՝ անկախ «վեցյակի» հետ միջուկային համաձայնագրի գոյությունից և ՄԱԳԱՏԷ-ի հետ հարաբերություններից: Այդ մասին հաղորդվում է նախագահի պաշտոնական կայքում՝ տեղեկացնում է RIA Novosti-ն։
«Նույնիսկ եթե չլինի ԳՀՀԾ-ն կամ ՄԱԳԱՏԷ-ի հետ երաշխիքների մասին հմաձայնագիրը, անկախ այն բանից՝ լավ են, թե վատ ՄԱԳԱՏԷ-ի հետ մեր երկրի հարաբերությունները, մենք չենք ընկնի միջուկային զենքի հետևից»,- ասել է Ռոհանին:
Նա նաև դիմել է եվրոպական եռյակին (Գերմանիա, Ֆրանսիա և Մեծ Բրիտանիա) և հայտարարել, որ նրանք պատասխանատվություն են կրելու միջուկային համաձայնագրի խախտման հետևանքների համար, որ եթե Եվրոպան վերադառնա իր պարտավորությունների կատարմանը, Իրանը նույնպես կվերադառնա դրանց կատարմանը:
Մինչ այդ Իրանի նախագահի վարչակազմի ղեկավար Մահմուդ Վայեզին հայտարարել է, որ Թեհրանը պատրաստ է դիմել վճռական միջոցների, ներառյալ Գործողությունների համատեղ համապարփակ ծրագրից դուրս գալն այն դեպքում, եթե Եվրոպան Իրանի կողմից միջուկային գործարքի պայմանների խախտման վերաբերյալ գործն ուղարկի ՄԱԿ-ի Անվտանգության խորհուրդ:
Ավելի վաղ Իրանի արտաքին գործերի նախարար Մոհամադ Ջավադ Զարիֆը հայտարարել է, որ իր երկիրը դուրս կգա Միջուկային զենքի չտարածման պայմանագրից (ՄԶՉՊ), եթե Եվրոպան ԳՀՀԾ-ի պայմանների խախտման վերաբերյալ գործն ուղարկի ՄԱԿ-ի Անվտանգության խորհուրդ: «Եթե Եվրոպան կատարի իր պարտավորությունները, ապա մենք կվերադառնանք մեր հանձնառությունների իրականացմանը։ Իսկ եթե նրանք շարունակեն քաղաքական խաղերը, որոնք օրինական հիմքեր չունեն, ապա մենք շատ տարբերակներ ունենք պատասխանելու համար»,- ասել է Զարիֆը։
Զարիֆն ընդգծել է, որ Թեհրանը մտադիր չէ նոր քայլեր անել ԳՀՀԾ-ի գծով իր պարտավորությունների կրճատման ուղղությամբ։
