Ի՞նչ կարող է նշանակել հսկայածավալ գաղտնի տեղեկատվության տիրապետող նախկին պաշտոնյաների անհասկանալի մահը, և այս երևույթն ինչ բացասական հետևանքներ կարող է ունենալ պետության համար: «Առաջին լրատվական»-ի հետ զրույցում այս և մի շարք այլ հարցերի անդրադարձան քաղաքագետ Արմեն Վարդանյանը, «ժողովրդավարական համախմբում» նախաձեռնության համահիմնադիր, քաղաքագետ Սուրեն Պետրոսյանը:
Հիշեցնենք՝ Անցած շաբաթ Պարույր Սևակի փողոցի իր բնակարանում հայտնաբերվեց ԱԱԾ նախկին պետ Գեորգի Կուտոյանի դին։ Քննչական կոմիտեի կողմից անցկացված քննության արդյունքում ինքնասպանության հասցնելու հոդվածով քրեական գործ է հարուցվել։
Արմեն Վարդանյանի խոսքով՝ քաղաքական սպանություններ եղել են Հայաստանի ամբողջ պատմության մեջ և իրենց հետքն են թողել. «Իշխանության համար այս խնդրի բացահայտումը պատվի հարց է: Եթե այդ սպանությունները չեն բացահայտվում, ապա որոշ խմբեր, կուսակցություններ սլաքներն ուղղում են իշխանության վրա: Այժմ էլ այդպիսի ակնարկներ կան: Իշխանությունը պետք է ամեն կերպ բացահայտի այս սպանությունները կամ ինքնասպանությունները, որպեսզի շահարկումներ չլինեն»:
Քաղաքագետը նկատեց, որ վարչապետը հայտարարությամբ հանդես չեկավ և ցավակցական ուղերձ չհղեց ԱԱԾ նախկին ղեկավար Գեորգի Կուտոյանի մահվան կապակցությամբ:
Արմեն Վարդանյանի կարծիքով՝ հսկայածավալ գաղտնի, բացառիկ տեղեկատվության տիրապետող նախկին պաշտոնյաները պետք է գտնվեն պետության հովանու ներքո, նրանց անվտանգությունը պետք է պահպանվի, որպեսզի ֆիզիկապես չոչնչացվեն:
Անդրադառնալով դիտարկմանը, որ այլ երկրներում նախկին ԱԱԾ ղեկավարներին, պաշտպանության նախարարներին, գլխավոր դատախազներին և երկրի անվտանգության հետ առնչվող, գաղտնի տեղեկատվության տիրապետող այլ նախկին բարձրաստիճան պաշտոնյաներին թույլ չի տրվում երկիրը լքել, այլ առաջարկվում է որևէ աշխատանք, Սուրեն Պետրոսյանը նշեց, որ այդ հարցը պետք է կարգավորվի օրենսդրորեն, ոչ թե քաղաքական կամքով. «Պետք է գործի հստակ օրենսդրություն, որը պետք է ոչ թե իրավիճակային խնդիր կարգավորի, այլ հեռանկարային»:
Մանրամասն՝ տեսանյութում: