Օրերս վարչապետ Նիկոլ Փաշինյանն իր ելույթում անդրադարձավ լրատվամիջոցների թափանցիկության խնդրին՝ մասնավորապես նշելով. «Մեր երկրում հասարակական կազմակերպությունները և լրատվամիջոցները պետք է լինեն թափանցիկ՝ սկսած իրական սեփականատերերի թափանցիկությունից:
Թեմայի շուրջ «Առաջին լրատվական»-ի հետ զրույցում ռեժիսոր, պրոդյուսեր Էդգար Բաղդասարյանը նշեց. « Լրատվական դաշտում տիրող իրավիճակը խայտառակություն է. 90 տոկոսը լրատվամիջոց կոչվելու իրավունք չունեն. նեղ քաղաքական, նեղ կուսակցական կամ նեղ կլանային հարցեր լուծող կազմակերպություններ են, այսպես շարունակել չի կարելի: Թե ինչ գործիքներով, չեմ կարող ասել, բայց պետք է դաշտը կարգավորվի, ցենզուրա պետք է լինի, դա անխուսափելի է»:
Վարչապետի կարծիքով՝ Հայաստանի Հանրապետությունում ժողովրդավարության մակարդակն այնքան բարձր է, որ այսօր այստեղ նույնիսկ կոռուպցիոներների հեռուստաընկերություններ կան. «Առնվազն 2 հեռուստաալիքի լոգոյի տեղը կարելի է գրել՝ «Կոռուպցիա» կամ «Կոռուպցիա գրուպ»»:
Էդգար Բաղդասարյանը նշեց, որ որոշ չափով համամիտ է այս տեսակետին. «Սրա ակունքները գալիս են շատ խորքից՝ 90-ականների վերջից, երբ իշխանությունը հասկացավ, որ պետք է ունենալ ուժեղ լրատվամիջոցներ, որոնց միջոցով ամեն ինչ կարող է անել… Իշխանությունը դա արեց օլիգարխների ձեռքերով, բոլորս գիտենք՝ որ լրատվամիջոցն ումն է: Դա որքանով է նպաստում դաշտի զարգացմանը, Հայաստանի զարգացմանը, կարծում եմ՝ ոչ թե նպաստում է, այլ ավելի շատ քայքայում է»:
«Կան խնդիրներ, որոնք գալիս են երկար ժամանակ պետականության բացակայությունից, պետք է լուծել դրանք, պետականաշինության ռեյտինգով վերջին տեղերում ենք, պետք է սովորենք, ոչ թե կենացներ ասենք,- ընդգծեց մեր զրուցակիցը:- Հիմա կա երկու Հայաստան՝ կա վիրտուալ Հայաստան և կա իրական Հայաստան. իշխանությունն ապրում է վիրտուալ Հայաստանում: Բայց մենք ուզում ենք ոչ թե թվեր լսել տնտեսական աճի և այլնի մասին, այլ աչքով տեսնել»:
Մանրամասն՝ տեսանյութում: