Քննչական կոմիտեն տեղեկացրել է, որ Երևանի բնակարաններից մեկում հրազենային վնասվածքի հետևանքով սպանված է գտնվել ԱԱԾ նախկին պետ Գեորգի Կուտոյանը: Դեպքի առիթով հարուցվել է քրեական գործ, կատարվում է քննություն: Առայժմ չկան մանրամասներ:
Ինչն է ԱԱԾ նախկին պետ Կուտոյանի սպանության պատճառը, այն կապված է նրա, այսպես ասած, անձնական կյանքի՞, հետպաշտոնեական գործունեության որևէ բնագավառի՞, թե՞ պաշտոնավարմանն առնչվող որևէ իրադարձության հետ: Կստանա՞ հանրությունն այդ հարցերի պատասխանը, թե՞ ԱԱԾ նախկին պետի սպանությունը կհամալրի Հայաստանի հետանկախական շրջանի տասնյակ աղմկոտ սպանությունների շարքը, որոնք այդպես էլ չեն բացահայտվել, կամ որոնց բացահայտվածության պաշտոնական վարկածները չեն բավարարել հանրությանը:
ԱԱԾ նախկին պետ Գեորգի Կուտոյանն այդ պաշտոնին նշանակվեց 2016 թվականին՝ Գորիկ Հակոբյանի հեռանալուց հետո: Կուտոյանի նշանակումն ինչ-որ իմաստով անսպասելի էր, քանի որ նա չէր դիտարկվում Գորիկ Հակոբյանին հավանական փոխարինողների շարքում: Գեորգի Կուտոյանն աշխատում էր Սերժ Սարգսյանի աշխատակազմում, նա ԱԱԾ պաշտոնյա չէր, այդ կառույցը գլխավորեց ոչ այդ համակարգի, այսպես ասած, հիերարխիկ որևէ աստիճանից, ինչը ևս հատկանշական էր, առավել ևս այն ներքաղաքական և արտաքին քաղաքական միջավայրում, որում Հայաստանը գտնվում էր մի շարք առումներով հատկանշական 2016 թվականին: Այդ հանգամանքը էլ ավելի է սրում և բազմապատկում հարցերը՝ կապված ԱԱԾ նախկին պետի սպանության հետ:
Միևնույն ժամանակ նրա սպանությունը տեղի է ունենում Հայաստանի ներքաղաքական կյանքում յուրօրինակ մի իրավիճակում, երբ ներքին կյանքը մեծ հաշվով գտնվում է հետհեղափոխական վերախմբավորման փուլում, որը ուղեկցվում է նոր իշխանության ու նախկին համակարգի միջև որոշակիորեն լայն ու նաև՝ այդ շրջանակում էլ նոր իշխանության ու նախկին համակարգի միջև ամենատարբեր, այսպես ասած, լոկալ դիմակայություններով, որոնցից մեկն էլ ԱԱԾ մեկ այլ նախկին պետ Արթուր Վանեցյանի ներգրավվածությամբ ուղղությունն է:
Հեղափոխությունից հետո Արթուր Վանեցյանը ԱԱԾ պետի պաշտոնում փոխարինեց հենց Գեորգի Կուտոյանին: