Աշխարհում մարդու իրավունքների կացությանը նվիրված ամենամյա զեկույցում արևմտյան ամենահեղինակավոր իրավապաշտպան կառույցներից մեկի՝ Human Rights Watch-ի ներկայացուցիչները նշում են, որ Նիկոլ Փաշինյանի կառավարությունը ձեռնամուխ է եղել բարեփոխումների հավակնոտ ծրագրի իրագործմանը, այդ թվում՝ կոռուպցիայի դեմ պայքարի, տնտեսական և արդարադատության ոլորտներում։
Որքանո՞վ եք համամիտ այն գնահատականների հետ, որ հնչեցվում են զեկույցում․ «Առաջին լրատվական»-ի հարցին իրավապաշտպան Զարուհի Հովհաննիսյանը պատասխանեց․ «Զեկույցին ոչ միայն ծանոթ եմ, այլ նաև աշխատել եմ ամբողջ պատրաստման փուլում, հատկապես կանանց իրավունքներին, բնապահպանական իրավունքներին վերաբերող հարցերի շուրջ։ Զեկույցի մեջ հնչած գնահատականների հետ հիմնականում համաձայն եմ։ Այդ գնահատականներն արտացոլում են այն իրավիճակը, որն առկա է մարդու իրավունքների տեսանկյունից Հայաստանում այժմ։ Հեղափոխությունից հետո հույս կար, որ մարդու իրավունքների վերաբերյալ 2016-2017 թվականների բոլոր իրավախախտումներն իրավապահ համակարգը կբացահայտի և լույս կսփռի այդ խնդիրների վրա, սակայն այժմ մենք տեսնում ենք խտրական վերաբերմունք՝ որոշ անձանց վերաբերյալ քրեական գործերը բացվում են, սակայն կան հանրային հնչեղության գործեր՝ Սարի թաղի դեպքերը, Էլեկտրիկ Երևանի դեպքերը, որոնք այդպես էլ չբացահայտվեցին»։
Իսկ ԱԺ «Իմ քայլը» խմբակցության պատգամավոր, ԱԺ մարդու իրավունքների պաշտպանության հանձնաժողովի անդամ Ռուստամ Բաքոյանն ասաց․ «Մենք 2018 թվականին երբ իշխանության եկանք, մեր առջև հստակ նպատակ է դրել, որ ոչ միայն մարդու իրավունքների ոլորտում, այլ առհասարակ բոլոր ոլորտներում պետք է գնանք հեղափոխական բարեփոխումների ճանապարհով։ Մենք հիմա գնում ենք այդ ճանապարհով, այլ բան է, որ այդ ճանապարհին մենք կարող ենք հանդիպել խնդիրների, որոնք, հնարավոր է՝ համեմատաբար դժվար հաղթահարելի լինեն, որովհետև նախորդ իշխանություններից մնացած մասնիկները կարող են խոչընդոտել այդ բարեփոխումներին։ Դրանով պայմանավորված այդ բարեփոխումները ժամանակի ընթացքում կարող է ինտենսիվ չլինեն՝ ավելի դանդաղ ընթանան, բայց, այնուամենայնիվ, բարեփոխումները տեղի են ունենում»։
«Քաղաքացիական հասարակության ինստիտուտ» ՀԿ-ի տնօրեն Արտակ Կիրակոսյանն էլ ասաց․ «Մենք անընդհատ խոսում ենք, որ պետք է փորձել այս վերջին 30 տարվա ընթացքում եղած խնդիրները բացահայտել, և սա ինչ-որ իմաստով հատվածային է դիտվում։ Պետք չէ կենտրոնանալ միայն 2008 թվականի դեպքերի վրա, մենք խնդիրներ ունենք դեռ 1995 թվականից։ Այստեղ խոսքը գնում է մի խնդրի մասին, որը կոչվում է քաղաքական գնահատական։ Եթե մենք ընդհանուր համակարգին գնահատական չենք տվել, դրա համար էլ անընդհատ այն հատվածային է դիտվում»։
Մանրամասները՝ տեսանյութում։
