«Նախկինում կառավարելի անարդարությունը ներկայումս դարձել է անկառավարելի քաոս»,- «Առաջին լրատվական»-ի հետ զրույցում ամփոփելով հետհեղափոխական ժամանակահատվածում իրականացված դատաիրավական բարեփոխումները, դատաիրավական համակարգում տիրող վիճակը՝ կարծիք հայտնեց Հելսինկյան կոմիտեի փաստաբան Արայիկ Պապիկյանը: Նրա խոսքով՝ դատաիրավական ոլորտում որևէ դրական բարեփոխում չկա: Առկա է բացառապես դատական անիշխանությունը, ինչը բացասական հետևանքներ ունի ՀՀ յուրաքանչյուր քաղաքացու համար:
Փաստաբանի խոսքով՝ հեղափոխությունից հետո իշխանությունների ձեռնարկած բոլոր փոփոխությունները պահի ազդեցության տակ կատարված ոչ հեռատես քայլեր էին:
«Առաջին փաթեթը՝ 14 օրենքների նախագծերով, ներկայացվեց ամռանը, որով զրոյանում էր սահմանադրական ինստիտուտ դատական իշխանությունը ընդհանրապես: Դա, սակայն, կյանքի չկոչվեց և, եթե չեմ սխալվում, նույնիսկ Ազգային ժողով չհասավ: Դրանից հետո երկրորդ փաթեթը սեպտեմբերին մշակվեց, որը նախագծի փուլից այն կողմ չանցավ: Ընդունվեց միայն դատաիրավաան ոլորտի ռազմավարությունը, որը ենթադրվում է ավարտին հասցնել 2023 թվականին: Այսինքն՝ այսօրվա իշխանությունը ցանկանում է դատական անիշխանությունը կարգավորել միայն 23 թվականին: Սա լավագույն գնահատականն է իշխանություններին, որը պլանավորել է մի բան, ինչը պետք է կյանքի կոչվի երեք-չորս տարուց: Այլ կերպ ասած՝ չկա որևէ լուրջ ռազմավարություն: Իշխանությանը չհաջողվեց լուծել անգամ Սահմանադրական դատարանի ճգնաժամը. փորձեցին լուծել կարգապահականի հարուցումով: Չաշխատեց, հետո պլան Բ-ն առաջ քաշվեց՝ մտցրին վաղ կենսաթոշակի օրենքը, որը ևս չի գործելու: Կրկնում եմ՝ արվում են միայն պահի ազդեցության տակ, իրավիճակով թելադրված գործողություններ: Չունենք ոչ մի առարկայական քայլ ամբողջ դատաիրավական համակարգի վերաբերյալ»,- ընդգծեց Պապիկյանը՝ ավելացնելով, որ մոտ երկու տարվա մեջ Ազգային ժողովը չի ընդունել գեթ մեկ օրենք, որը կարող է էական նշանակություն ունենալ դատաիրավական ոլորտի համար:
«Ոլորտի բարեփոխումները կատարելապես ձախողված են: Իշխանությունները գիտակցում են, որ խնդիր կա, բայց իրավիճակը չեն շտկում, քանի որ, ինչպես ասաց վարչապետը՝ համակարգը դիմադրում է: Բայց ես չեմ հասկանում, թե վարչապետն ինչու է բողոքում: Հենց ինքն է համակարգի ղեկավարը: Հետևաբար ես կարծում եմ, որ, այո՛, դիմադրություն կա, բայց կա նաև ոչ պրոֆեսիոնալ մոտեցում խնդիրների լուծման հարցում: Իշխանությունը, իշխանության երկու թևերում ունենալով կատարյալ մեծամասնություն և լիարժեք ազատություն, ոչ մի լուրջ քայլ չկատարեց: Հավանաբար համակերպվել են այս իրավիճակի հետ: Կոմֆորտ վիճակ է իրենց համար: Դատաիրավական բարեփոխումները ռազմավարությունների մշակմամբ գեղեցիկ փաթեթավորել են մինչև 2023 թվականը: Իսկ մինչև 2023 թվականը մենք ամեն օր ցնցումների մեջ պետք է ապրենք, ամեն օր բռնեն-բաց թողնեն, մեղադրանք առաջադրեն, մեղադրանքը փոխեն, գործը կարճեն, հետո վերաբացեն: Այս շոուն դարձրել են մեզ համար ամենօրյա կերակուր, որպեսզի չնկատենք, որ ամեն ինչ կործանվում է»,- ընդգծեց փաստաբանը:
Մեր զրուցակցի խոսքով՝ դատաիրավական համակարգում ստեղծված ներկայիս անիշխանությունը չափազանց վտանգավոր է և սպառնում է մեր պետությանը, պետական ինստիտուտներին: Լուրջ չվերաբերվել ստեղծված վիճակին, Պապիկյանի խոսքով, նշանակում է պետական կառավարման քաոս ստեղծելու վտանգավոր հիմքերը չգիտակցել:
«Շատ ցավալի է, որ հեղափոխական տրամաբանության մեջ այս հիմքերը չլուծվեցին: Առարկայական քայլեր չանելը չափազանց վտանգավոր է, և դրա հետևանքները շատ շուտով իր կաշվի վրա կզգա քաղաքական իշխանությունը: Հասարակությունը, որն ամեն օր առերեսվում է այս վիճակի հետ, այլևս իր 70-80 տոկոսանոց վստահության քվեն չի տա այս իշխանությանը, որը կարող է այսպես մսխել այդ կապիտալը»,- եզրափակեց Արայիկ Պապիկյանը: