Մարդու իրավունքները մի այնպիսի ոլորտ է, որ միշտ խնդիր կա, որովհետև մարդու իրավունք է ամեն ինչը: Այս մասին «Առաջին լրատվական»-ի հետ զրույցում նշեց ԱԺ ԲՀԿ խմբակցության պատգամավոր, ԱԺ մարդու իրավունքների պաշտպանության և հանրային հարցերի հանձնաժողովի նախագահ Նաիրա Զոհրաբյանը՝ ամփոփելով 2019 թվականը:
«Ցանկացած ոլորտ, որին առնչվում ես, մարդու իրավունք է՝ կնոջ իրավունք, երեխայի իրավունք, հաշմանդամություն ունեցող անձանց իրավունք, սպառողի իրավունք, աշխատողի իրավունք, զինվորի իրավունք, ազատությունից զրկվածի իրավունք, հոգեկան առողջության խնդիրներ ունեցողի իրավունք: Իհարկե, օրենսդրական բազայի առումով մեր հանձնաժողովն այնքան ծանրաբեռնված չէ, որքան ասենք տնտեսական հանձնաժողովը կամ պետաիրավական հանձնաժողովը, բայց իր աշխատանքի առումով բավական ծանրաբեռնված է, որովհետև երբ նայում եմ իմ ամենօրյա գրաֆիկը և փորձում եմ հասկանալ, թե 24 ժամվա ընթացքում ինչպես եմ հասցնելու լինել այս ՔԿՀ-ում, հետո գնալու այն հոգեբուժարանի, հետո այս մանկատուն, հետո արյունաբանության ինստիտուտ, հետո որևէ քննարկում մտավորականների հետ, որն առնչվում է իրենց իրավունքին»,-ասաց նա:
Նաիրա Զոհրաբյանը արձանագրեց, որ այսօր մարդու իրավունqներն ավելի քիչ են խախտվում, քան նախկինում. «Այո, դա ակնհայտ է, բայց եթե նախկինում մարդիկ զգուշանում էին, վախենում էին դիմել հանձնաժողով կամ ՄԻՊ, որովհետև կար մտավախություն, որ իրենց խնդիրը չի լուծվելու, հիմա ինձ նույնիսկ երեխաներն են նամակ գրում»,-ընդգծեց հանձնաժողովի նախագահը:
