«2019 թվականը ես համարում եմ դրական միտումների տարի. երկրում ընթանում են դատավարություններ, որոնք լույս կսփռեն մեր անկախության պատմությունը մթագնած մի շարք իրադարձությունների վրա և կդատապարտեն մեղավորներին»,- ամփոփելով 2019 թվականը՝ «Առաջին լրատվական»-ի հետ զրույցում ասաց գրող Վահրամ Մարտիրոսյանը:
Նա հույս հայտնեց, որ այդ դատավարությունների ընթացքում կվերադարձվեն միլիարդավոր դոլարների թալանը, որն այս իշխանությունը ճիշտ կօգտագործի:
Բեմադրիչ Ռուբեն Բաբայանն էլ նշեց, որ ինքն էությամբ հեղափոխական չէ, կողմ է բարեփոխումներին, ինչը, սակայն, չի նշանակում, որ մերժում է հեղափոխությունը. «Սակայն դա չի կարող լինել պերմանենտ՝ այն իր հետևից բերում է բարեփոխումներ»:
Ամփոփելով 2019 թվականը՝ Ռուբեն Բաբայանը «Առաջին լրատվական»-ի հետ զրույցում նկատեց, որ իր համար բարեփոխումների քանակը բավարար չէր. «Իրականում ես չեմ տեսնում լուրջ քայլեր, որպեսզի մենք ունենանք անկախ դատական համակարգ: Ես չեմ տեսնում լուրջ վերահսկողություն Ազգային ժողովի կողմից կառավարության հանդեպ»:
Այնուամենայնիվ, նա նշեց, որ կան նաև որոշակի համակարգային փոփոխություններ. «30 տարի շարունակ ես պնդում եմ մշակույթը զարգացնելու շատ կարևոր օրենքների մասին՝ մեկենասության և հովանավորչության մասին: Սա միայն ֆինանսական հարց չէ, այլ նաև արվեստ-հասարակություն իրար հետ կապելու պատասխանատվություն զգալու հարց է»:
Հիշեցնելով վարչապետ Փաշինյանի ելույթը՝ Ռուբեն Բաբայանը նշեց, որ այժմ երկրի առաջին դեմքի կողմից տեղի ունեցավ իմպերատիվ որոշում. «Կտեսնենք՝ ինչպես կշարունակվի այս ամբողջ պատմությունը»:
Շնորհավորելով ՀՀ քաղաքացիներին Ամանորի կապակցությամբ՝ Վահրամ Մարտիրոսյանը ընդգծեց. «Երկրորդ տարին է, որ մենք շնչում ենք բոլորովին այլ կերպ. Սերժ Սարգսյանի հրաժարականի օրը իմ ուսերից ասես 50 կգ քաշ ընկած լիներ: Ես ուզում եմ, որ մարդիկ գնահատեն այդ ազատության օդը: Այդ ազատության օդը պետք է օգտագործել իշխանությանը զգաստ պահելու համար»:
Ռուբեն Բաբայանն էլ ցանկացավ, որ յուրաքանչյուրն իրեն տեր զգա. «Երջանիկ կարող է լինել միայն տերը»:
Հարցազրույցն ամբողջությամբ՝ տեսանյութում: