Օրերս վարչապետ Նիկոլ Փաշինյանի մոտ տեղի է ունեցել խորհրդակցություն, որի ընթացքում քննարկվել է Վանաձորի զարգացման ծրագիրը, որով նախատեսվում է նաև իրականացնել ճոպանուղու կառուցում, Վանաձորի 3 արհեստական լճերի տարածքում հիմնել հանգստի գոտի՝ հյուրանոցային և մարզական համալիրներով, ջրային ատրակցիոններով ու համերգասրահով: Ծրագրի մեջ են մտնում նաև Ազատամարտիկների պուրակի արդիականացման, հեծանվային ուղիների կառուցման և այլ ենթակառուցվածքների բարելավման նախագծեր:
Վանաձորի քաղաքապետ Մամիկոն Ասլանյանը «Առաջին լրատվական»-ի հետ զրույցում, անդրադառնալով զարգացման ծրագրին, նշեց, որ գարնանը կմեկնարկեն աշխատանքները։ Այս պահին դժվար է ասել՝ որքան գումար է անհրաժեշտ. «Դեռևս վերջնական, ամփոփ ծախսեր չունենք, բոլորը խոշորացված են։ Մենք ամբողջ փաթեթը նախագծանախահաշվային կատարելուց հետո նոր կկարողանանք թվային տեղեկատվություն տրամադրել»։
Քաղաքի զարգացման ծրագիրը կյանքի կոչելուց հետո, ըստ քաղաքապետի, Վանաձորի շնչառությունը ևս մեկ աստիճանով կբացվի, Վանաձորը գրավիչ կդառնա և՛ դրսի, և՛ ներսի տնտեսվարողների համար։ Քաղաքապետի կարծիքով՝ Վանաձորի համար առաջիկայում լավ ժամանակներ կգան։
Մամիկոն Ասլանյանը նշեց, որ ՏԻՄ օրենքով նախատեսված լիազորություններն ամբողջությամբ իրականացվում են, որևէ արտաքին միջամտություն չկա: «Մենք ազատ ենք մեր տնտեսական քաղաքականությունը որոշելիս, ազատ ենք բյուջետային քաղաքականությունը որոշելիս՝ բնականաբար, հստակեցնելով կառավարության հետ։ Մեծ առումով, ապակենտրոնացումը երկրի զարգացման համար ճիշտ տեսլական է»,- հավելեց նա։
Հարցին՝ հնարավո՞ր են Վանաձորում ՏԻՄ ընտրություններ՝ հաշվի առնելով ընդդիմադիրների՝ այդ մասին անընդհատ բարձրաձայնումը, Մամիկոն Ասլանյանը նշեց. «Ես գլուխս կախ իմ թիմի, ընկերների, կառավարության հետ համատեղ ծրագրերի միջոցով իրականացնում եմ իմ գործունեությունը։ Ճիշտն ասած՝ ես չեմ մտածել ընտրությունների մասին»։
