Ադրբեջանական Trend լրատվական գործակալության փոխանցմամբ՝ Ադրբեջանի արտգործնախարար Էլմար Մամեդյարովն ընդունել է Եվրախորհրդարանի անդամներ Ֆրանկո Գաստոնային, Ֆերեյրա Ֆեռնանդես Խոսե Մանուելին և բելգիական խորհրդարանի անդամ Ալեն Դեստեկսիին։
Հանդիպման ժամանակ Մամեդյարովն իր հյուրերին իրազեկել է բոլոր ոլորտներում Ադրբեջանի դինամիկ զարգացման և երկրի աճող տարածաշրջանային դերի մասին։ Անդրադառնալով ղարաբաղյան հակամարտության կարգավորմանը՝ Մամեդյարովն ընդգծել է Ադրբեջանի «օկուպացված» տարածքներից հայկական զորքերի միանշանակ դուրսբերման կարևորությունը՝ նշելով, որ տվյալ պահանջն արտացոլող մի շարք փաստաթղթեր այդ պլանում հանդիսանում են իրավական հենք։
Եվրախորհրդարանի պատգամավորներն իրենց հերթին կարևորել են Եվրախորհրդարանի ու Ադրբեջանի միջև համագործակցության հետագա զարգացումն ու ընդլայնումը։ Նրանք նաև հույս են հայտնել, որ ղարաբաղյան հակամարտությունը կկարգավորվի խաղաղ ճանապարհով։ Քննարկվել են նաև փոխադարձ հետաքրքրության կենտրոնում ընկած մի շարք այլ հարցեր։
Հիշեցնենք, որ ղարաբաղյան հակամարտության կարգավորման հետ կապված՝ վաղը Մամեդյարովը երկօրյա աշխատանքային այցով մեկնելու է Մոսկվա։
