«2019-ին շատ այցելուներ ունեցանք, որոնց թիվը հասնում է մոտ 21 000-ի: Շատ գումար աշխատեցինք գրքերի, հուշանվերների վաճառքից: Ստամբուլում մեծ դժվարությամբ ցուցահանդես կազմակերպեցինք, որը բացառիկ հաջողություն ունեցավ: Այս տարի ցուցահանդես ենք կազմակերպել նաև Սորբոնում»,- այս մասին «Առաջին լրատվական»-ի հետ զրույցում ասաց Փարաջանովի տուն-թանգարանի տնօրեն Զավեն Սարգսյանը՝ հավելելով, որ հայկական արվեստը ցուցադրվում է դրսում, որպեսզի շատ մարդ հնարավորություն ունենա այցելելու. «Մեծ քաղաքաներում հազարավոր մարդիկ են այցելում ցուցահանդեսին, և իմանում են Հայաստանի տեղը… Արտասահմանյան մեծ քաղաքներում հայ արվեստի ցուցադրությունները տուրիզմի խթան են հանդիսանում»:
Ամանորին տուն-թանգարանն աշխատելու է: «Ակնկալում ենք, որ այս օրերին շատ այցելուներ կունենանք»,- հույս հայտնեց Զավեն Սարգսյանը: Խոսելով առաջիկա ծրագրերի մասին, նա նշեց, որ 2024-ին Փարաջանովի ծննդյան հարյուրամյակն է լրանում և պետք է պատրաստվել դրան: Նա նաև տեղեկացրեց, որ վերատպվել են Փարաջանովի բանտային նամակները, նախատեսվում է նաև «Նռան գույնը» ֆիլմի չկրճատված տարբերակի կադրերից ալբոմ թողարկել:
Մանրամասն՝ տեսանյութում։