Արցախյան հիմնախնդրի կարգավորման հարցում ի՞նչ նոր մոտեցումներ են արձանագրվել 2019-ին և ի՞նչ է ակնկալվում 2020-ին: «Առաջին լրատվական»-ի հետ զրույցում անդրադառնալով այս հարցերին՝ «Ռեգիոն» հետազոտական կենտրոնի տնօրեն Լաուրա Բաղդասարյանը նշեց, որ 2019-ին տեղի են ունեցել մի քանի հանդիպումներ հայ և ադրբեջանական կողմերի միջև, բայց էական առաջընթաց տեղի չի ունեցել բանակցությունների գործընթացում. «Այս տարի կողմերը դեռ ծանոթանում էին միմյանց դիրքորոշումների հետ»:
Լաուրա բաղդասարայանի կարծիքով՝ Արցախում և Ադրբեջանում 2020-ի գարունը հետաքրքիր է լինելու ընտրությունների առումով, սակայն դրանք բովանդակային առումով որևէ էական ազդեցություն չեն թողնի Արցախյան հակամարտության բանակցային գործընթացի վրա:
Լ. Բաղդասարյանի դիտարկմամբ՝ 2019-ն առանձնացավ արցախյան հիմնախնդրի կարգավորման հարցի վերաբերյալ սկզբունքների հստակեցմամբ. «Կուռ շարադրանքը, սկզբունքների կետ առ կետ հստակեցումը ներկայիս իշխանության կոնցեպտն է, որն էականորեն շատ չի տարբերվում արցախյան հարցի կարգավորման վերաբերյալ եղած դիրքորոշումից, շեշտադրումներն են ավելի խտացված: Բանակցություններին Արցախի մասնակցության մասին ևս խոսվել է նախկինում, սակայն նշվել է, որ որոշումների կայացմանը պետք է մասնակցի, իսկ այժմ, ենթադրում եմ, որ նկատի է առնվում Արցախի մասնակցությունը բանակցային գործընթացի բոլոր փուլերում:
«Հուսով եմ, որ 2020-ին բանակցային գործընթացը կշարունակվի: Վատ խաղաղությունը շատ ավելի լավ է, քան պատերազմը,- ընդգծեց մեր զրուցակիցը: -Շատ կարևոր է, որ բանակցային գործընթացի մենեջմենթում հայկական կողմն էլ կարողանա էական քայլեր անել, այլ ոչ թե միայն այն երկրները, որոնք շահագրգռված են այս խնդրով»:
Մանրամասն՝ տեսանյութում։
