Ֆրանսիայում դատարանը մեղադրանք է առաջադրել France Télécom (ներկայում՝ Orange), Ֆրանսիայի հեռահաղորդակցական ընկերության նախկին գլխավոր տնօրեն և նախագահ Դիդյե Լոմբարդին՝ օպերատորի աշխատակիցների զանգվածային ինքնասպանության դեպքի պատճառով՝ հայտնում է BBC News-ը:
77-ամյա Լոմբարդը դատապարտվել է 12 ամսվա ազատազրկման, որից նա միայն չորս ամիս կանցկացնի ճաղերի հետևում, քանի որ մնացած ութ ամիսները պայմանական են նշանակվել: Նրանից կպահանջվի նաև 15 հազար եվրո տուգանք վճարել: Նմանատիպ պատժի են դատապարտվել նաև ընկերության երկու առաջատար մենեջերներ:
Դատարանը Լոմբարդին և ընկերության երկու մենեջերներին մեղավոր է ճանաչել ենթակաների նկատմամբ հոգեբանական բռնության պատճառով, ինչի արդյունքում ընկերության մի շարք աշխատակիցներ ինքնասպանություն են գործել: Բացի այդ, հեռահաղորդակցման օպերատորի ևս չորս առաջատար մենեջերներ դատապարտվել են այս հանցագործությանը մասնակից լինելու համար և դատապարտվել են չորս ամսվա փորձաշրջանի և յուրաքանչյուրի համար 5 հազար եվրո տուգանքի: Լոմբարդի փաստաբանը ասել է, որ իր պաշտպանյալը մտադիր է բողոքարկել դատավճիռը:
Դատավարության ընթացքում քննվել է France Télécom-ի 39 աշխատակցի գործ, նրանցից 19-ը ինքնասպանություն է գործել, 12-ը ինքնասպանության փորձ է կատարել: Մնացած ութ անձինք սկսել են տառապել ընկճվախտից․ պատճառը ընկերությունում նրանց կրած տառապանքներն են՝ եզրակացրել է դատարանը:
2000-ականներին France Télécom- ի ղեկավարությունն իրականացրել է ընկերության զանգվածային վերակազմավորում: Հեռահաղորդակցման օպերատորի բարձրագույն ղեկավարությունը նախատեսում էր կրճատել 22 հազար մարդու և վերապատրաստել 10 հազար աշխատակիցների:
Վերակազմավորման շրջանակներում ընկերությունը իր մի շարք աշխատակիցների տեղափոխել է այլ քաղաքներ՝ իրենց ընտանիքներից հեռու, ոմանց վստահել է աշխատանք, որը նրանք համարում էին նվաստացուցիչ:
Նման ճնշման արդյունքը զանգվածային ինքնասպանություններն են եղել: Ինքը՝ Լոմբարդը, խոստովանել է, որ այդ միջոցառումները կարող էին տխրեցնել ընկերության որոշ աշխատակիցների, բայց հրաժարվել է խոստովանել, որ դա կարող էր ինքնասպանության պատճառ լինել։
