Դեկտեմբերի 13-ին և 14-ին Ծաղկաձորում կայացած «Հետազոտություններ և տեխնոլոգիաներ» խորագրով համաժողովի ընթացքում տեղի ունեցավ նաև հայաստանյան գիտահետազոտական թիմերի 2019 թվականի մրցանակաբաշխության հանդիսավոր արարողությունը։ Ի սկզբանե մրցույթի մասնակցության 126 հայտ է ներկայացվել՝ Հայաստանի տարբեր համալսարանական թիմերից , որոնցից, սակայն, հաղթող է ճանաչվել միայն քսանը։ Հաղթած յուրաքանչյուր թիմին տրվելու է 7 միլիոն դրամի ֆինանսական աջակցություն։
«Մեր այս մրցույթներին և ծրագրերին կարող են դիմել բացառապես Հայաստանի համալսարանների մաս կազմող հետազոտական թիմերը, այսինքն՝ երբ որ ասում ենք ֆակուլտետային ֆինանսական աջակցության ծրագիր, ապա այն հայտարարվում է համալսարանների, հետազոտական ինստիտուտների համար։ Անհատը չի կարող դիմել, այլ պարտադիր պետք է դիմի հետազոտական թիմը, ով ներկա պահին ունի հետազոտական աշխատանք, այդ աշխատանքն ընթացքի մեջ է և այս ֆինանսական աջակցության շնորհիվ կարողանալու է նոր լուծումներ, նոր սարքավորումներ և անհրաժեշտ այլ բաներ գնել՝ իր հետազոտությունն ավելի առաջատար իրականացնելու համար,-»ասաց Ձեռնարկությունների ինկուբատոր հիմնադրամի ծրագրերի ղեկավար Ամալյա Եղոյանը։
Հաղթողների ցանկում է նաև Երևանի պետական համալսարանի քիմիայի ֆակուլտետի ուսումնական լաբորատորիան ներկայացնող հետազոտական թիմը։
Լաբորատորիայի վարիչ Նաղաշ Միրաքյանի խոսքերով՝ այս ծրագիրը հնարավորություն կտա բարելավելու մասնագիտական կարողությունները, ձեռք բերել նորագույն սարքավորումներ ու նյութեր՝ իրենց հետազոտությունները շարունակելու համար։
Հետազոտական այս թիմը զբաղվում է օրգանական հաղորդիչ և կիսահաղորդիչ պոլիմերների ուսումնասիրությամբ, որն անընդմեջ զարգացող ուղղություն է ամբողջ աշխարհում։
«Ֆիլիպ Մորրիս» ընկերության գիտահետազոտական կենտրոնի էկոհամակարգերի ղեկավար Մարիամ Դավթյանի խոսքով` գիտությունը բավականին թանկ հաճույք է և այս տեսանկյունից գիտական խմբերը սովորաբար կարիք են ունենում տարբեր սարքավորումների, լաբորատոր փորձարկումների: «Կարծում ենք, որ այս աջակցությունը կօգնի նաև տեխնիկական մասով իրենց աշխատանքներն ի կատար ածելու ճանապարհին։ Եվս մեկ կարևոր հանգամանք՝ մենք որպես ինդուստրիա և մասնավոր կողմ՝ մենք հետևում ենք աշխարհում տեղի ունեցող տեխնոլոգիական զարգացման թրենդերին և այս մասով կարող ենք օգնել կիսվելով նաև մեր կազմակերպության գիտելիքներով՝ ավելի կոնկրետ, թե որ գիտական ուղղությունում հիմա ինչպիսի աշխատանքներ են տարվում, որպեսզի մեր գիտնականներն առաջինը՝ օժանդակեն դրան, երկրորդ՝ ստեղծեն ավելի լավը, եթե դա հնարավոր է , և երրորդ՝ առաջարկեն լրիվ նոր մոտեցումներ»։
