Грузия Online-ի փոխանցմամբ՝ «Մերսեր» հետազոտական կենտրոնը հետազոտություն է անցկացրել՝ պարզելու աշխարհի ամենաթանկարժեք քաղաքները։ Դրա արդյունքում նշվել է, որ Հարավային Կովկասի ամենաէժան քաղաքը Թբիլիսին է, իսկ ամենաթանկը՝ Բաքուն։ Նրանց միջև է Երևանը։
Հետազոտության ժամանակ մասնագետները հաշվի են առնում ավելի քան 200 ապրանքատեսակի ու ծառայությունների գները։ Դրանց թվում են անշարժ գույքի վարձակալությունը, սննդի ու բենզինի արժեքը։ Էտալոն է համարվում Նյու Յորքի ապրանքների գները։
Թանկարժեքության տեսանկյունից Բաքուն գերազանցել է այնպիսի քաղաքների, ինչպիսիք են Ստամբուլը, Ֆրանկֆուրտը, Բրյուսելը, Բեռլինը, Լոս Անջելեսը, Վաշինգթոնը՝ զբաղեցնելով 48-րդ տեղը։ Երևանը զբաղեցրել է 167-րդ, իսկ Թբիլիսին՝ 191-րդ տեղը։
Ամենաթանկարժեք քաղաքի կարգավիճակը շարունակում է պահպանել Անգոլայի մայրաքաղաք Լուանդան, ապա գալիս են Տոկիոն, Նջամենան և Մոսկվան։ Ամենաէժան քաղաք է ճանաչվել պակիստանյան Կարաչին։
