Google կորպորացիան հարավկորեական Samsung ընկերությանն օգնություն է առաջարկել Apple-ի արտոնագրային գործով: Այս մասին հայտնում է The Wall Street Journal-ը:
Apple-ը դատարանում ներկայացրել է փաստաբան Ջեյմս Մաքքոունի ցուցմունքները, ով հաստատել է Samsung-ի հասցեին համացանցային հսկայի էլեկտրոնային նամակների իսկությունը:
Google-ն առաջարկել է Samsung-ին փակել դատական ծախսերի մի մասը և մասնակի վճարել վնասի դիմաց՝ դատարանում հարավկորեական ընկերության պարտության դեպքում: Մաքքոունը նաև հաստատել է, որ Google-ն ու Samsung-ը կնքել են համաձայնագիր, որը թույլ է տալիս Samsung-ին կիրառել Google-ի հավելվածներն իր սարքերում:
Google-ի իրավական պաշտպանությունը վերաբերում է 5 արտոնագրերից 2-ին: Apple-ը Samsung-ից պահանջում է 2.2 մլրդ դոլար այդ արտոնագրերի խախտման համար: Իր հերթին Samsung-ը հաստատում է, որ Apple-ը խախտել է իր 2 արտոնագրերը և 7 մլն դոլար է պահանջում:
