Դեկտեմբերի 13-ին և 14-ին Ծաղկաձորում կայացավ «Հետազոտություններ և տեխնոլոգիաներ» խորագիրը կրող 2-րդ համաժողովը, որը կազմակերպվել էր PMI Science-ի և Ձեռնարկությունների Ինկուբատոր Հիմնադրամի համատեղ ջանքերով։
Երկօրյա համաժողովի օրակարգը բավականին հագեցած էր. բացի մասնագիտական քննարկումներից ու թեմատիկ աշխատաժողովներից, համաժողովի շրջանակներում տեղի ունեցավ նաև ասպիրանտական աջակցության ծրագրի դրամաշնորհի հաղթողների մրցանակաբաշխությունը։ Ծրագրին Հայաստանի տարբեր բուհերից ի սկզբանե դիմել էր 33 ասպիրանտ, որոնցից հաղթող ճանաչվեցին միայն տասը։ Նրանցից յուրաքանչյուրն էլ որպես կրթաթոշակ ստանալու է 700 հազար դրամ։
«Շատ կարևոր է նշել, որ գնահատումը, այսինքն՝ ասպիրանտների աշխատանքների ստուգումն իրականացրել են ոչ միայն Հայաստանի մասնագետները, այլև ԱՄՆ-ում հայ ինժեներների և գիտնականների միության ներկայացուցիչները և փաստենք նաև, որ բացառապես օբյեկտիվ գնահատում է տեղի ունեցել»,-«Առաջին Լրատվական»-ի հետ զրույցում ասաց Ձեռնարկությունների ինկուբատոր հիմնադրամի ծրագրերի ղեկավար Ամալյա Եղոյանը:
Ասպիրանտական ծրագրի տասը հաղթողներից մեկն էլ մասնագիտությամբ կենսաքիմիկ Լիլիթ Արշակյանն է ։ Նա ներկայացնում էր օրգանական և դեղագործական քիմիայի գիտատեխնոլոգիական կենտրոնը։
«Ֆիլիպ Մորրիս» ընկերության գիտահետազոտական կենտրոնի էկոհամակարգերի ղեկավար Մարիամ Դավթյանը շեշտեց, որ այս ամենն արվում է մի նպատակով, որպեսզի գիտնականներն երկարաժամկետ զբաղվեն այնպիսի աշխատանքներով, որոնք կօգնեն ընկերությանը՝ այլընտրանքային պրոդուկտների մշակման ճանապարհին գիտահետազոտական կենտրոնում, և, առհասարակ, կխթանեն Հայաստանում գիտական էկոհամակարգն ու գիտական ենթակառուցվածքների զարգացումը։ «Մենք հավատում ենք, որ ռեսուրսներն ու ներուժը, որը գոյություն ունի Հայաստանում շատ կարևոր են և շատ օգտակար են մեր երկարաժամկետ պլանների իրականացման ճանապարհին»։
Գիտական հանրության ներկայացուցիչներն ու նախաձեռնության կազմակերպիչները փաստում են, որ նմանատիպ ծրագրերի իրականացումը Հայաստանի գիտական համայնքի համար կարող է դառնալ արդյունավետ հարթակ՝ համաշխարհային ասպարեզում հայկական հետազոտական և տեխնոլոգիական ընկերությունների դերը բարձրացնելու համար։