ՀՀ երկրորդ նախագահ Ռոբերտ Քոչարյանի պաշտպանական խումբը Քոչարյանի նկատմամբ գրավի ընդունելի չափը թողնում է դատարանի հայեցողությանը։ Այս մասին դատարանում հայտարարեց փաստաբան Հայկ Ալումյանը։
«Դատարանը պետք է սահմանի գրավի չափ և, եթե կալանքի տակ գտնվող անձը չկարողանա վճարել սահմանված գումարը, ապա կշարունակի մնալ կալանքի տակ կամ կբողոքարկի որոշումը։ Մենք ողջամիտ չափ չենք ուզում առաջարկել դատարանին, որպեսզի մի հատ էլ լրացուցիչ ապացուցման բեռը չկրենք, թե ՝ այսքան գումարն ինչու է ողջամիտ կամ ողջամիտ չէ։ Եթե մենք ինչ-որ չափ ասենք, կստացվի, որ պետք է այդ չափն էլ հիմնավորենք և դրա շուրջ ևս պետք է դատավարություն ընթանա»,- նշեց Ալումյանը։
Փաստաբանը նաեւ պնդեց, որ դատարանն ապահովի քննությունը՝ միայն բողոքի շրջանակներում։ Ըստ նրա՝ «Ռոբերտ Քոչարյանի նկատմամբ գրավ կիրառելու գործով դատավարությունը փորձ է արվելու վերածել հանրահավաքի», ինչի դեմ կներկայացնեն առարկություն։
Դատարանի հարցին, թե արդյո՞ք դատավարական առումով որևէ փոփոխություն չի եղել՝ Ալումյանը պատասխանեց, որ այդ հարցն արդեն վերաքննիչ բողոքի սահմաններից հեռու է, որովհետև Առաջին ատյանի դատարանը միջնորդությունը չի մերժել հիմնավորմամբ, որ որևէ դատավարական առումով որևէ փոփոխություն չի եղել։ «ՄԻԵԴ դիրքորոշումները, որոնք մեզ մոտ շատ քիչ են դեռ կիրառվում, բայց այդ դիրքորոշումները գոյություն ունեն և դա պետք է հաշվի առնել։ Որքան երկար է անձը մնում կալանքի տակ, այնքան ավելի կարևոր է դառնում նրա ազատ արձակվելու իրավունքը»,-ընդգծեց Ալումյանը։