Ռուսական С-400 ՀՕՊ համակարգերի գնման և «Թուրքական հոսք» գազատարի կառուցման հետ կապված ԱՄՆ-ի պատժամիջոցները չեն խանգարի Թուրքիային քայլեր ձեռնարկել իր ազգային անվտանգության պաշտպանության համար, Անկարան միջոցներ կձեռնարկի ի պատասխան Վաշինգտոնի գործողություններին, ասվում է Թուրքիայի ԱԳՆ-ի հայտարարության մեջ:
Երեքշաբթի ԱՄՆ սենատը և ներկայացուցիչների պալատը քվեարկել են 738 միլիարդ դոլարի չափով պաշտպանական բյուջեի համար, որը ենթադրում է «եվրոպական էներգետիկ անվտանգության պաշտպանություն պատժամիջոցների կիրառման միջոցով՝ կապված ռուսական «Հյուսիսային հոսք 2» և «Թուրքական հոսք» գազատարների հետ: Պաշտպանական բյուջեն նաև ենթադրում է ամերիկյան վերջին F-35 ինքնաթիռների Թուրքիային մատակարարման արգելք՝ ի պատասխան Անկարայի կողմից ռուսական C-400 համակարգերի գնման:
«Մենք ևս մեկ անգամ հիշեցնում ենք, որ սպառնալիքների և պատժամիջոցների լեզուն չի խանգարի, որ Թուրքիան վճռական միջոցներ ձեռնարկի իր ազգային անվտանգությունն ապահովելու համար: Ոչ ոք չպետք է կասկածի, որ Թուրքիան կձեռնարկի անհրաժեշտ միջոցները՝ ի պատասխան մեր երկրի նկատմամբ այդ թշնամական նախաձեռնությունների»,- նշել են Թուրքիայի արտգործնախարարությունում:
