«Առաջին լրատվական»-ի հետ զրույցում ԱԺ պատգամավոր Վարդան Բոստանջյանը նշեց, որ այս շրջանում նկատվող գնանկումը սեզոնային երևույթ է, գյուղատնտեսական մթերքները ամեն տարի, որպես կանոն, շատ թե քիչ ավելի մատչելի են լինում:
Նրա խոսքով, նաև բնակչությունն ավելի շատ սպառում է նման տիպի ապրանքատեսակներ և համեմատաբար ավելի շատ պահանջարկը բերում է գների մակարդակի իջեցման:
«Ես կարծում եմ՝ այնքան էլ ողջունելի չէ, որ դա (գնանկումը՝ որպես ձեռքբերում.- 1in.am) որևէ մեկը վերցնի իր վրա»,- ասաց Վ. Բոստանջյանը:
Հիշեցնենք, որ օրերս Երևանի պետական համալսարանում ՀՀ վարչապետը նշել էր, թե «հիմա կայունացման միջավայրում ենք գտնվում, իսկ արտաբյուջետային և դրամավարկային քաղաքականությունները ուղղված են գնաճի զսպմանը, և այս տարվա արդյունքները ցույց են տալիս, որ մենք արդեն հասել ենք այդ գործում բավական մեծ հաջողությունների: Տարվա սկզբից այս պահի դրությամբ գնաճը կազմում է 3.5 տոկոս, մենք մտել ենք դեֆլյացիոն փուլ: Այսինքն՝ հուլիսին նույնպես լինելու է գնանկում, ինչպես նաև օգոստոսին է լինելու գնանկում»:
