Երեկ վերջապես պարզվեց, որ մեկ տարի առաջ Պրահայում հայտնաբերված Սերժ Սարգսյանի եղբորորդուն՝ Նարեկ Սարգսյանին, Չեխիայի իրավապահները որոշել են հանձնել Հայաստանին։
«Հաշվի առնելով հանրային լայն հետաքրքրությունը՝ տեղեկացնում ենք, որ Չեխիայի Հանրապետության իրավասու մարմինների կողմից որոշում է կայացվել բավարարել հետախուզվող Նարեկ Սարգսյանին քրեական հետապնդման ենթարկելու նպատակով Հայաստանի Հանրապետության իրավապահ մարմիններին հանձնելու մասին Հայաստանի Հանրապետության գլխավոր դատախազության միջնորդությունը:
Այս կապակցությամբ ՀՀ գլխավոր դատախազությունը ՀՀ ոստիկանությանը հանձնարարել է կազմակերպել Նարեկ Սարգսյանի տեղափոխումը»,- երեկ «Ֆեյսբուք» սոցիալական ցանցում այսպիսի գրառում էր արել ՀՀ գլխավոր դատախազի խորհրդական Գոռ Աբրահամյանը։
ՀՀ ոստիկանության հասարակայնության հետ կապի և լրատվության վարչության պետ Աշոտ Ահարոնյանից հետաքրքրվեցինք, թե ինչ ընթացքի մեջ է Նարեկ Սարգսյանի՝ Գոնսալեսի տեղափոխումը Հայաստան։
«Չեխ իրավապահների հետ տեխնիկական հարցերը կարգավորելու շուրջ ընթանում են բանակցություններ, որից հետո կտեղեկացնենք արդյունքների մասին»,- «Առաջին լրատվական»-ի հետ զրույցում ասաց Աշոտ Ահարոնյանը։
Հարցին, թե որն է ողջամիտ ժամկետը, որի ընթացքում Նարեկ Սարգսյանին կարող են տեղափոխել Հայաստան, մեր զրուցակիցն արձագանքեց․ «Եթե կան տեխնիկական հարցեր, ապա կոնկրետ ժամկետ չեմ կարող նշել։ Երբ կլուծվեն տեխնիկական հարցերը, նրան կտեղափոխեն»։
Հիշեցնենք, որ Նարեկ Սարգսյանը մեղադրվում էր ՀՀ Քրեական օրենսգրքի ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելու, իրացնելու, պահելու, փոխադրելու կամ կրելու և թմրամիջոցների, հոգեմետ նյութերի և դրանց պրեկուրսորների ապօրինի շրջանառությունն իրացնելու կամ պատրաստելու նպատակով կամ դրանց ապօրինի իրացնելու հատկանիշներով։ Նրա նկատմամբ հայտարարվել էր միջազգային հետախուզում։ Մեկ տարի առաջ Նարեկ Սարգսյանը ձերբակալվել էր Պրահայում, նա ներկայացրել էր Գվատեմալայի քաղաքացու կեղծ անձնագիր՝ Ֆրանկլին Գոնսալեսի անհատական տվյալներով։