Չինական ծագմամբ ամերիկացի հետազոտող Սիյուե Վանը, որը մեղադրվում էր Իրանի իշխանությունների նկատմամբ լրտեսության համար, ազատ է արձակվել իրանցի գիտնականի՝ ԱՄՆ-ում ձերբակալված պրոֆեսոր Մասուդ Սոլեյմանիի ազատ արձակման փոխարեն:
Սիյուե Վանը ձերբակալվել է Իրանում 2016 թվականին, նրան մեղադրել են օտարերկրյա իշխանությունների հետ համագործակցության համար:
Նա Իրանում հետազոտություն է կատարել իր ատենախոսության համար և մեղադրվել է չափազանց գաղտնի տեղեկատվությանը հասանելիություն ստանալու փորձի համար՝ այնուհետև այն ամերիկյան և բրիտանական գիտական կազմակերպություններին փոխանցելու նպատակով: Նրան դատապարտել են 10 տարվա ազատազրկման, որից 3-ը նա արդեն անցկացրել է բանտում:
Ցողունային բջիջների մասնագետ Մասուդ Սոլեյմանին ձերբակալվել է 2018 թվականին: Նրան մեղադրել են առևտրային պատժամիջոցների խախտմամբ կենսանյութերը Իրան տեղափոխելու փորձերի համար:
Երկու գիտնականներն էլ պնդել են իրենց անմեղությունը:
Այս փոխանակումը երկու երկրների միջև փոխադարձ համագործակցության բացառիկ դեպք է:
Վանը Շվեյցարիայի կառավարական ինքնաթիռով Թեհրանից թռչել է Ցյուրիխ, իսկ այնուհետև՝ Գերմանիա, որտեղ նա կանցնի բուժզննում, որից հետո կուղևորվի տուն: Սոլեյմանին ևս թռչել է Ցյուրիխ և, ինչպես սպասվում է, շուտով կուղևորվի Թեհրան: