Այսօր՝ դեկտեմբերի 6-ին, Ազգային ժողովում շարունակվում է հերթական նստաշրջանի աշխատանքը:
Պատգամավոր Արման Բաբաջանյանը հայտարարեց. «Նախօրեին հայտնի դարձավ, որ արտախորհրդարանական ուժերից մեկը ներքին շրջաբերական է տարածել երկրում պետության դեմ պարտիզանական մարտեր տանելու վերաբերյալ: Նորանկախ Հայաստանի պատմության առաջին փուլում իր ահաբեկչական անցյալով հայտնի այդ ուժը հիմա էլ որոշել է պարտիզանական մարտեր մղել պետության դեմ»:
Պատգամավորը կարծում է, որ ԱԺ-ն պետք է իր գնահատականը տա. «Վերջնարդյունքում թիրախը ԱԺ արտահերթ ընտրություններն են, և բոլոր խմբակցությունները պետք է իրենց վերաբերմունքը հայտնեն»:
Արման Բաբաջանյանը հիշեցրեց, թե այդ ժողովը վարած Հրանտ Մարգարյանն ինչով էր զբաղված 90-ականների սկզբին. «Երբ թմրանյութ էր տեղափոխում, և այդ գործողությունները ղեկավարում էր Դավիթ Շահնազարյանը, որը հիմա միացել է այդ նույն խմբակին: Եվ չպետք է մոռանանք, թե «Դրո» կառույցը, «31-ի գործը» ինչի մասին էին, և թե Հոկտեմբերի 27-ի ոճրագործներն ինչ կապ ունեին այդ ուժի հետ»:
Արման Բաբաջանյանի կարծիքով՝ պետք է զորակցություն հայտնել «Նիկոլ Աղբալյան»-ի այն խիզախ երիտասարդներին, ովքեր հաստատեցին, որ տեղի է ունեցել այդպիսի հավաք՝ պետության դեմ «պարտիզանական» մարտեր մղելու. «Խելքները թող գլուխները հավաքեն, և ԱԱԾ-ն պետք է իր ուշադրության տակ առնի այս երևույթը: Մենք չենք կարող կրավորական կերպով հանդուրժել այսպիսի երևույթները»:
Մանրամասները՝ տեսանյութում: