Լուրեր
Հայաստանը քիչ է նայում արտաքին աշխարհի զարգացումներին, զբաղված է ներքաղաքական խնդիրներով. Ավիգդոր Էսկին
  • 16:00
  • 2019-12-04
  • Դիտումներ՝ *

Շատ հաճախ զուգահեռներ են անցկացնում հրեաների և հայերի միջև՝ երկու ազգերն էլ հայտնվել են բարդ աշխարհաքաղաքական իրավիճակում, երկու ազգերն էլ շրջապատված են թշնամիներով, երկու ազգերն էլ ունեն հնագույն պատմություն։ Չնայած այս ամենին՝ հայ-իսրայելական հարաբերությունները չի կարելի բնութագրել կայուն։ Ո՞րն է խնդիրը․ «Առաջին լրատվական»-ի հարցին իսրայելցի քաղաքագետ, հասարակական գործիչ Ավիգդոր Էսկինը պատասխանեց․ «Հայ-իսրայելական հարաբերությունները կայուն չեն, որովհետև դրանք չեն էլ եղել։ Հետաքրքրություն չի եղել երկկողմանի։ Այն բանից հետո, երբ Հայաստանը դարձավ անկախ պետություն, հայտնվեց դժվար պայմանում՝ բլոկադան Հայաստանին մղեց Իրանի հետ հարաբերությունների մերձեցմանը, որը կոտրեց Իսրայելի հետ հարաբերությունների ստեղծման ցանկությունը։ 1990-ականներին Իսրայելի կառավարությունը բազմիցս դիմել է Հայաստանի իշխանություններին դիվանագիտական, առևտրային հարաբերություններ ստեղծելու համար, սակայն Հայաստանի իշխանություններն այդպես էլ չեն պատասխանել։ Այժմ իրավիճակը փոխվել է, և Հայաստանի ներկայիս իշխանությունները հետաքրքրված են Իսրայելի հետ բարեկամական հարաբերությունների ստեղծմամբ։ Այսինքն՝ այժմ մենք բացում ենք նոր, սպիտակ էջ մեր հարաբերություններում»։

Ըստ ձեզ՝ ի՞նչը կարող է խոչընդոտ հանդիսանալ այդ սպիտակ էջի բացմանը․ «Առաջին լրատվական»-ի հարցին Ավիգդոր Էսկինը պատասխանեց․ «Ես կարծում եմ, որ առաջ եկած նոր միտումները պետք է երկու կողմերին մղեն մերձեցման։ Ինչո՞ւ Իսրայելն այսօր պետք է շատ ավելի հետաքրքրված լինի Հայաստանով։ Առաջին հերթին, ես կարծում եմ, որ ամբողջ աշխարհն է Հայաստանին անարդար նայում, բայց գուցե հիմա կհասկանան, թե ինչ աշխարհաքաղաքական նշանակություն ունի Հայաստանը։ Երբ այսօր մենք տեսնում ենք Թուրքիայի, Էրդողանի ագրեսիվ մոտեցումները, Հայաստանը, ինչպես Վրաստանը, դա այն բուֆերային գոտին է, որն արգելակ է հանդիսանում պանթյուրքիզմի ընդլայնմանը։ Այնպես որ, տարածաշրջանի կայունության համար Հայաստանը շատ կարևոր դերակատարություն ունի։ Եվ, ըստ այդմ, զարգացած Հայաստանը ոչ միայն պետք է հայերին, այլ նաև ամբողջ տարածաշրջանին։ Ահա դա է պատճառը, որ այսօր Իսրայելն ավելի շատ է հետաքրքրված Հայաստանով՝ Թուրքիայի ագրեսիվ պահվածքից ելնելով»։

 

Մանրամասները՝ տեսանյութում։

  • Դիտումներ՝ *