Օրերս թուրքական Nordic Monitor-ը Թուրքիայի զինուժի գլխավոր շտաբում եղած գաղտնի պլան է բացահայտել, ըստ որի՝ Սիրիայից հետո Թուրքիայի հաջորդ թիրախը Հայաստան էր լինելու: Ըստ հոդվածի՝ այն կազմվել է դեռևս 2001 թվականից և վավեր է մինչ այժմ: Հոդվածագիրը նշում է, որ պլանի առկայության մասին բացահայտվել է թուրքական գլխավոր շտաբի արտահոսքից:
ԱԺ «Իմ քայլը» խմբակցության պատգամավոր, ԱԺ արտաքին հարցերի մշտական հանձնաժողովի անդամ Միքայել Զոլյանը, անդրադառնալով տեղեկատվական արտահոսքին, թե ինչ ազդեցություն կունենա, երեք դիտարկում առանձնացրեց.«Առաջին՝ ինքնին արտահոսքի փաստը, կարծում եմ, պետք է դիտարկել ներկայիս թուրքական վարչակարգի և նրա ներքին հակառակորդների պայքարի համատեքստում։ Հատկանշական է, որ արտահոսքի հեղինակն ընդդիմադիր հայացքներով լրագրող է, ով 2016 թ․ իրադարձություններից հետո քաղաքական հետապնդումների է ենթարկվել և տեղափոխվել է Եվրոպա։
Երկրորդ՝ նման պլանների գոյության փաստն ինքնին նորություն չէ որևէ մեկի համար։ Յուրաքանչյուր երկրի Գլխավոր Շտաբ մշակում է հնարավոր ռազմական գործողությունների պլաններ ամենատարբեր իրավիճակների համար։ Իսկ, այն որ ներկայիս Թուրքիան մեր հանդեպ թշնամաբար տրամադրված պետություն է, ոչ մեկիս համար նորություն չպիտի լինի։ Արցախյան պատերազմի տարիներին գոյություն ուներ թուրքական ներխուժման իրական վտանգ, ինչը հաջողվեց կանխել Հայաստանի հեռատես, զուսպ և հավասարակշռված քաղաքականության շնորհիվ։ Հետագա տարիներին այդ վտանգը զգալիորեն նվազել է, բայց երբեք իսպառ չի վերացել։
Երրորդ, այդ պլանների գոյությունը մտահոգիչ է՝ հաշվի առնելով Թուրքիայի ներկա անկայուն իրավիճակը։ Թուրքիայի ներկա իշխանությունների արկածախնդիր քաղաքականության պատճառով այսօր Թուրքիան ունի բազմաթիվ խնդիրներ՝ թե՛ ներքին, թե՛ արտաքին քաղաքականության մեջ։ Այսօր Թուրքիան ղեկավարում են մարդիկ, ովքեր ևս մի քանի տարի իշխանության մեջ մնալու համար պատրաստ են զոհաբերել իրենց երկրի երկարաժամկետ շահերը։ Դրանում համոզվելու համար, բավական է հետևել Սիրիայում թուրքական արկածախնդրությանը կամ երկրի ներսում քաղաքական բռնաճնշումների ալիքին, որը Թուրքիան կանգնեցրել է քաղաքացիական պատերազմի վտանգի առջև։ Այդ մարդիկ գնալով ավելի շատ են կտրվում իրականությունից։
Այսպես, օրինակ, Էրդողանն, արձագանքելով Մակրոնի այն հայտարարությանը, որ ՆԱՏՕ-ի ուղեղը մահացած է, առաջարկել է Մակրոնին ստուգել սեփական ուղեղը, թեև, կարծում եմ, այդ խորհուրդն առաջին հերթին օգտակար կլիներ հենց Թուրքիայի ներկայիս իշխանությանը։ Արտաքին և ներքին թշնամիների դեմ ատելություն բորբոքելը դարձել է Էրդողանի քաղաքական երկարակեցության բանաձևը»։
Պատգամավորը չի կարծում, թե պետք է գերագնահատել այդ վտանգը, քանի որ այդ քաղաքականության հիմնական թիրախը ներքին է՝ Թուրքիայի փոքրամասնությունները և թուրք հասարակության ազատական հատվածը։
« Եվ վերջապես, Թուրքիայի կողմից հնարավոր արկածախնդրության դեմ մենք ունենք երկու հուսալի երաշխիք՝ Հայաստանի հավասարակշռված արտաքին քաղաքականությունը և Հայաստանի զինված ուժերը»,-հավելեց նա։