Հյուսիսատլանտյան դաշինքն անօրինական է համարում Ղրիմի հանրաքվեն, քանի որ համաձայն Ուկրաինայի Սահմանադրության՝ երկրի տարածքի փոփոխման վերաբերյալ հարցերը լուծվում են բացառապես համաուկրաինական հանրաքվեի միջոցով:
Այս մասին ասված է դաշինքի հայտարարության մեջ՝ ի պատասխան մեղադրանքի, որը հնչեցվել էր Ռուսաստանի նախագահ Վլադիմիր Պուտինի կողմից: Այս մասին հայտնում է «Ուկրինֆորմը»:
Հայտարարության մեջ նաև ասված է, որ հանրաքվեն կազմակերպվել էր Ղրիմի ինքնահռչակ ղեկավարության կողմից, որը նշանակվել էր ռուս զինվորականների կողմից կառավարական շենքերի զավթումից հետո:
Հյուսիսատլանտյան դաշինքում սխալ են համարել զուգահեռների անցկացումը Ղրիմի բռնակցման և Կոսովոյում արևմտյան ուժեր մտցնելու միջև, քանի որ Կոսովոյի անկախության հռչակման գործընթացը, ի տարբերություն Ղրիմի, չի եղել հապճեպ և տևել է մի քանի տարի, ավելին՝ ՄԱԿ-ի վերահսկողության ներքո:
