ԱՄՆ վարչակազմը մտադիր է օգնել Ուկրաինային կոռուպցիայի դեմ պայքարում, ինչպես նաև գողացված ակտիվների որոնման և հայրենիք վերադարձման հարցում: Ինչպես ITAR-TASS-ին հայտնել է Սպիտակ տանը կից Ազգային անվտանգության խորհրդի պաշտոնական ներկայացուցիչ Քեյթլին Հեյդենը, այդ նպատակով Ուկրաինա է ուղարկվել ԱՄՆ ֆինանսների, արդարադատության նախարարությունների և FBI-ի մասնագետների խումբը:
Նրա խոսքով՝ խումբը ուկրաինական կառավարությանը պետք է խորհրդատվություն տրամադրի առ այն, թե ինչպես անցկացնել հետաքննություն և հավաքել ապացույցներ, որոնք անհրաժեշտ են գողացված ակտիվներն արտերկրից վերադարձնելու համար:
Քեյթլինի փոխանցմամբ՝ ապրիլի 29-30-ը ԱՄՆ-ի և Մեծ Բրիտանիայի իշխանությունները համատեղ կգումարեն բազմակողմ հանդիպում ուկրաինացի պաշտոնատար անձանց և առանցքային ֆինանսական կենտրոններով երկրների իրենց գործընկերների հետ՝ համակարգելու գողացված ակտիվների հայտնաբերման ջանքերը: Թե որտեղ տեղի կունենա հանդիպումը՝ Հեյդենը չի հստակեցրել:
