Հայտնի է դարձել, որ բրիտանացի 42-ամյա շինարար Սթիվ Թոմփսոնը և նրա 41-ամյա կինը՝ Լենկան, որ վաճառողուհի է և Մեծ Բրիտանիայից Սլովակիա է տեղափոխվել, դարձել են «Եվրոմիլիոններ» միջազգային վիճակախաղի ջեքփոթի տերերը: Նրանք ստացել են 105 միլիոն ֆունտ ստեռլինգ (մոտավորապես 132 միլիոն դոլար) արժողությամբ դրամական մրցանակ:
Ըստ Daily Mail-ի՝ Սելսի քաղաքում բնակվող ամուսիններն այժմ ավելի հարուստ են, քան Հարի Փոթերի մասին կինոնկարի աստղերը՝ Դենիել Ռադկլիֆը և Էմմա Ուոթսոնը, երգիչ Հարի Սթայլսը, ինչպես նաև The Rolling Stones-ի անդամ Ռոնի Վուդը:
Այնուամենայնիվ, հաղթանակից մեկ օր հետո Սթիվը, ինչպես միշտ, գնացել է աշխատանքի: Եվ նա մտադիր է ավարտին հասցնել իր նախաձեռնած բոլոր նախագծերը: Բայց Սուրբ Ծնունդից հետո նա մտադիր է հանգստանալ և շատ պատվերներ չկատարել:
Թոմփսոններն իրենց երեք երեխաներին ասում են. «Եթե ինչ-որ բան եք ուզում, ապա պետք է վաստակեք այն»: Սթիվի և Լենկայի 10-ամյա որդին նրանցից արդեն խնդրել է Tesla ավտոմեքենա: Ութամյա դստեր խնդրանքը ավելի հեշտ է կատարել․ նրան պետք է վարդագույն iPhone: Իսկ զույգի 15-ամյա առաջնեկը դեռ խորհում է իր ցանկությունների մասին:
Թոմփսոնները պատրաստվում են նոր տուն գնել, որպեսզի բոլոր երեխաները ունենան առանձին ննջասենյակներ: Նրանք նաև մտադիր են որոշակի գումար նվիրաբերել տեղի համայնքին:
