Տնտեսական զարգացման նախաձեռնությունների կենտրոնն անդրադարձել է 2018-2019 թթ․ առաջին 9 ամիսների արտահանման դինամիկային․ մասնավորապես դիտարկվող ժամանակահատվածում արտահանման ծավալներն աճել են 7․9 %-ով՝ կազմելով 1․9 միլիարդ ԱՄՆ դոլար։ Արտահանման ծավալների աճը հիմնականում պայմանավորված է դեպի ԵԱՏՄ երկրներ՝ 6.4% (կազմելով 532.6 միլիոն ԱՄՆ դոլար), ԱՊՀ այլ երկրներ՝ 32.9% (կազմելով 19.9 միլիոն ԱՄՆ դոլար) և այլ երկրներ (բացառությամբ ԵՄ երկրների)՝ 24.9% (կազմելով 897.3 միլիոն ԱՄՆ դոլար) աճով, մինչդեռ դեպի ԵՄ երկրներ արտահանման ծավալների 14.7% անկում է գրանցվել (կազմելով շուրջ 453 մլն ԱՄՆ դոլար):
Հայաստանի պետական տնտեսագիտական համալսարանի «Ինովացիոն և ինստիտուցիոնալ հետազոտությունների կենտրոն»-ի ղեկավար, տնտեսագետ Ատոմ Մարգարյանի գնահատմամբ՝ ԵԱՏՄ երկրների և հատկապես Ռուսաստանի տնտեսությունը նոր թափ է հավաքում և վերականգնվում է տևական ռեցեսիայից հետո ( ռեցեսիա նշանակում է՝ տնտեսական աճի տեմպի չափավոր դանդաղում կամ անկում-խմբագրական), հետևաբար՝ այնտեղ ավելացել է նաև պահանջարկը։
«Հատկապես, եթե այս տարվա կոնյուկտուրային նայենք, ապա խոսքը վերաբերում է դեպի Ռուսաստան գյուղատնտեսական մթերքների, վերամշակված սննդի և ընդհանուր առմամբ՝ արտադրական ապրանքատեսակների արտահանմանը, այսինքն այն արտադրատեսակների, որոնց գծով պահանջարկի աճ կա և բացի դրանից էլ ռուսական շուկայի վճարունակության վերականգնման գործընթացն է իր դերն ունեցել այս ամենում։ Մյուս կողմից էլ՝ շուկաների փոխադարձ ադապտացիայի գործընթացն է ավելի բարենպաստ դառնում Հայաստանի և Ռուսաստան համար, որը ըստ իս՝ նշանակում է, որ արտահանումների այս վեկտորն առաջիկայում ավելի է աճելու»,- «Առաջին լրատվական»-ի հետ զրույցում ընդգծեց Ատոմ Մարգարյանը։
Ինչ վերաբերում է դեպի ԵՄ երկրներ արտահանումների ծավալի նվազմանը, ապա մեր զրուցակիցը նշեց․
«Եվրոպական երկրների տնտեսությունները լավ ժամանակներ չեն ապրում և ռեցեսիոն որոշակի միտումներ կան, ինչը որոշ չափով պայմանավորված է նաև ԱՄՆ նախագահ Դոնալդ Թրամփի վարչակազմի քաղաքականությամբ, որն արտաքին տնտեսական հատվածում առավելապես կոնֆրոնտացիոն է»։
Մանրամասները՝ տեսանյութում։
