Իսլամական հեղափոխության պահապանների զորակազմը (ԻՀՊԶ) խոստացել է վճռական միջոցներ ձեռնարկել և միջամտել երկրում անկայունության շարունակվելու դեպքում: Այդ մասին ասված է կազմակերպության մամուլի ծառայության` նոյեմբերի 18-ին տարածված պաշտոնական հայտարարության մեջ՝ տեղեկացնում է TASS-ը:
«Անվտանգության ամեն տեսակ սպառնալիքների և կայունության խախտմանն ուղղված գործողությունների շարունակվելու դեպքում վճռական պատասխան կտրվի»,-ԻՀՊԶ-ի հայտարարությունը մեջբերել է ISNA գործակալությունը:
ԻՀՊԶ-ն ընդգծել է «իշխանության բոլոր թևերի միասնության պահպանման կարևորությունը ընդհանուր սպառնալիքին դեմ հանդիման»: Զորակազմը նշել է, որ ինքն իրավունք ունի միջամտել երկրի ներքին գործերին անվտանգության և պետության ներսում իրադրության անկայունացման սպառնալիքների առկայության դեպքում:
Նոյեմբերի 15-ին Իրանում ուժի մեջ է մտել 1 լիտր բենզինի գինը կրկնակի՝ 15 հազար ռիալից (0,09 դոլար) մինչև 30 հազար ռիալ (մոտավորապես 0,2 դոլար) բարձրացնելու վերաբերյալ կառավարական կարգադրությունը: 50 տոկոսով (մինչև 15 հազար ռիալ) ավելացել է բենզինի արտոնյալ արժեքը մեկ մարդու համար նախատեսված քվոտայի շրջանակում:
Նոր կանոնների համաձայն՝ ավտոմեքենայի տերն այդ գնով ամսական կարող է ստանալ մինչև 60 լիտր բենզին, մոտոցիկլետի տերը՝ 25 լիտր: Առանձին բաժնեչափ է նախատեսված տաքսիստների համար՝ 400 լիտր: Դրանից հետո Իրանի մի շարք քաղաքներում տեղի են ունեցել բողոքի ակցիաներ, ընդհարումներ ոստիկանության հետ: Ցուցարարները հրկիզել են բանկերի գրասենյակներ և ավտոլցավորման կայաններ: Անկարգություններ են արձանագրվել հարյուրավոր փոքր բնակավայրերում:
Տեղական և արևմտյան զանգվածային լրատվամիջոցների հաղորդումներով՝ անկարգությունների ընթացքում զոհվել է 12-ից մինչև 30 մարդ, տասնյակ մարդիկ վնասվածքներ և վերքեր են ստացել: Նոյեմբերի 16-ին հանրապետության իշխանությունները երկրում անջատել են Համացանցը՝ մուտք թողնելով սոսկ որոշ առցանց ծառայությունների համար։
