Այսօր՝ նոյեմբերի 18-ին, Ազգային ժողովը շարունակում է աշխատանքը: Այժմ քննարկվում է Կոռուպցիայի կանխարգելման հանձնաժողովի անդամների ընտրության հարցը: Այս հանձնաժողովում 1-ական թեկնածուներ են առաջարկել կառավարությունը, «Իմ քայլը», «Բարգավաճ Հայաստան» և «Լուսավոր Հայաստան» խմբակցությունները և Բարձրագույն դատական խորհուրդը:
«Լուսավոր Հայաստան» խմբակցությունը Կոռուպցիայի կանխարգելման հանձնաժողովի անդամի պաշտոնում առաջարկել է Հայկուհի Հարությունյանի թեկնածությունը:
«Իմ տպավորությամբ՝ Դուք ամենապատրաստվածն եք այս թեկնածուների մեջ, բայց ես դեմ եմ քվեարկելու, որովհետև ես առհասարակ կարգին եմ դեմ»,- դիմելով թեկնածուին՝ ասաց պատգամավոր Արման Բաբաջանյանը:
Անդրադառնալով Հայկուհի Հարությունյանի գործունեությանը՝ պատգամավորն ասաց. «Դուք ստանձնել եք «Իրավունքների պաշտպանություն առանց սահմանների» ՀԿ նախագահի պաշտոնը, որը դրանից առաջ զբաղեցրել է Սիրանուշ Սահակյանը՝ Սերժ Սարգսյանի ռեֆերենտը, որը հետագայում դարձավ Բարձրաստիճան պաշտոնատար անձանց հանձնաժողովի նախագահ: Դուք ի՞նչ առնչության ունեք Սիրանուշ Սահակյանի հետ՝ դիսկոմֆորտ ունեցե՞լ եք»: Արման Բաբաջանյանը հավելեց, որ մի գրամ չի կասկածում թեկնածուի անկեղծությանը կոռուպցիայի դեմ պայքարի գործում:
Պատգամավորի համոզմամբ՝ Հայկուհի Հարությունյանն է լինելու այս հանձնաժողովում ՀԿ-ների ձայնը. «Ունեցե՞լ եք նրանց հետ քննարկումներ, և առհասարակ՝ ի՞նչ սպասումներ կան հասարակության համար այդ կարևոր հատվածում»:
Մանրամասները՝ տեսանյութում:
