Հայաստանի վարչապետ Նիկոլ Փաշինյանի որոշմամբ Մովսես Հակոբյանը ազատվել է գլխավոր ռազմական տեսուչի պաշտոնից: Որոշման պատճառների մասին մանրամասներ պաշտոնական հաղորդագրության մեջ նշված չեն: Հատկանշական է, որ Նիկոլ Փաշինյանի պաշտոնանկության մասին որոշման վերաբերյալ տեղեկատվությունը փաստացի հաջորդում է անվտանգության խորհրդի արտահերթ նիստին և Պաշտպանության նախարարության կոլեգիայի նիստին: Դրանք տեղի էին ունեցել երկու օր առաջ՝ նոյեմբերի 16-ին: ՊՆ կոլեգիայի նիստին մասնակցել էր նաև գլխավոր ռազմական տեսուչ Մովսես Հակոբյանը: Ի՞նչ հարցեր են քննարկվել ԱԽ արտահերթ և ՊՆ կոլեգիայի նիստերի ընթացքում և արդյո՞ք այդ քննարկումների արդյունքում է հասունացել գլխավոր ռազմական տեսուչի պաշտոնանկությունը, թե՞ պաշտոնանկությունը այսպես ասած հասունացել է ներքին քաղաքական զարգացումների ընթացքում, որոնց շրջանակում իհարկե առավել մեծ ուշադրության արժանացավ Վազգեն Մանուկյանի նախաձեռնությամբ Վերնատուն ակումբի առաջին համաժողովը, որն այլ բան չէր, քան նախկին իշխող համակարգի քաղաքական մոբիլիզացիայի հայտարարում:
Մովսես Հակոբյանը նախկին համակարգում նշանակալի դերակատարում ունեցած զինվորական է, որը զբաղեցրել է Արցախի պաշտպանության նախարարի պաշտոնը, հետո տեղափոխվել Երևան ու նշանակվել Զինված ուժերի գլխավոր շտաբի պետ: Հակոբյանի անունը շոշափվում է նաև մարտիմեկյան հայտնի գործում, երբ նա այդ ժամանակ Արցախի պաշտպանական բանակի հրամանատարն էր: Մամուլի տարբեր հրապարակումների համաձայն Հակոբյանն իր բարձրաստիճան զինվորական կարիերայի ընթացքում այս կամ այն կերպ առնչություն է ունեցել կոռուպցիոն ռիսկեր պարունակող գործերի, թեև այդ ամենի վերաբերյալ որևէ պաշտոնական հաստատում հանրությանը հայտնի չէ:
Մովսես Հակոբյանը ԶՈՒ գլխավոր շտաբի պետ նշանակվեց Յուրի Խաչատուրովի պաշտոնանկությունից հետո, մինչ այդ լինելով նրա տեղակալը՝ Երևան տեղափոխվելուց հետո: Նիկոլ Փաշինյանը թավշյա հեղափոխությունից հետո որոշ ժամանակ անց Մովսես Հակոբյանին ազատեց շտաբի պետի պաշտոնից և նշանակեց գլխավոր ռազմական տեսուչ: Այդպիսով, ներքին զարգացումների լայն շղթայի որ կետում է գլխավոր ռազմական տեսուչի պաշտոնից Հակոբյանին հեռացնելու որոշման պատճառը կամ մոտիվը, հնարավոր է միայն ենթադրել: Արդյո՞ք խոսքը զուտ ոլորտային տիրույթում գտնվող հարցերում եղած պատճառների մասին է, թե՞ քաղաքական:
