Ռուսաստանի Դաշնությունից Հայաստան ներկրվող գազի սակագինը ձմեռվա ամիսների ընթացքում և մինչև ապրիլի 1-ը չի թանկանա. սա բանկցությունների միջանկյալ արդյունք է: Այս մասին երեկ ԱԺ հարցուպատասխանի ժամանակ վստահեցրեց ՀՀ փոխվարչապետ Մհեր Գրիգորյանը: Ըստ փոխվարչապետի՝ բոլորի համար պետք է հասկանալի լինի, որ գազի ներքին սակագինը բաղկացած է առնվազն երեք բաղադրիչներից, երեքն էլ բանակցելի են, խոսքը՝ «Գազպրոմի» սահմանին տրվող սակագնի, հայկական «Գազպրոմի» ներդրումների և ընթացիկ ծախսերի մասին էր:
Ինչո՞ւ ցայսօր չկա գազի ներքին սպառման վերաբերյալ մանրամասն հիմնավորում: Իշխանության գալուց հետո Ն. Փաշինյանը հանձնարարեց ուսումնասիրություն իրականացնել այս ուղղությամբ, բայց այդ ուսումնասիրությունը կա՛մ չի իրականացվել, կա՛մ դրա արդյունքերի մասին չի հրապարակվել: Թեմայի շուրջ «Առաջին լրատվական»-ի հետ զրույցում տնտեսագետ Աշոտ Մարկոսյանը նշեց, որ գազի հետ կապված հարցերը միշտ եղել է ԱԺ-ի ուշադրության կենտրոնում ոչ միայն Ն. Փաշինյանի հանձնարարության հիման վրա են աշխատանքը կազմակերպել, այլ դրանից առաջ էլ երկու անգամ նման ուսումնասիրություն իրականացնելու համար հանձնաժողովներ են ստեղծվել, բայց արդյունքների մասին հանրությունը չի տեղեկացվել»: Աշոտ Մարկոսյանի խոսքով՝ ըստ էության՝ Հայաստանը Ռուսաստանից տնտեսական կախվածության մեջ է ընկնում, որովհետև ՌԴ-ում գազի գնի փոփոխությունը բերում է նաև ներքին շուկայում գնի որոշակի փոփոխության: «Առայժմ պետք է սպասենք քննարկումներին, վերջնական պայմանավորվածություններին, որովհետև գազի գինը միայն ՀՀ կառավարության որոշումից չի կախված»:
Չեն դադարում խոսակցությունները գազի գնի հնարավոր թանկացումների մասին: Եթե թանկանա գազի ներքին սպառման գինը, դա ինչպե՞ս կարող է անդրադառնալ մեր տնտեսության վրա: Անդրադառնալով այս հարցին՝ «Տնտեսական իրավունքի կենտրոն» ՀԿ նախագահ Մովսես Արիստակեսյանը նշեց. «Ակնհայտ է փաստը, որ գազի սակագինը, գնագոյացման մեթոդաբանությունը պաշտպանում է բնական մենաշնորհ հանդիսացող ծառայություն մատուցողների շահերը և ոտնահարում է սպառողների շահերը… Կոռուպցիոն սակագնային քաղաքականություն է վարվել, և դա պետք է վերանայվի: Պետք է գնալ գազի սակագնի գոյացման մեթոդաբանության փոփոխության»: Տնտեսագետի խոսքով՝ ԵԱՏՄ-ում նախատեսվում է բարձրացնել 13 տեսակի ապրանքների ակցիզային հարկերի դրույքաչափերը՝ այդ թվում նաև բնական գազի և բենզինի, այն ապրանքների, որոնք արժեքաստեղծ ապրանքներ են, և բնականաբար այդ թանկացումներն ազդելու են նաև Հայաստանում ստեղծվող արտադրանքատեսակների ինքնարժեքի վրա, ինչպես նաև սպառողների վրա»:
Մանրամասն՝ տեսանյութում: