Այսօր Լիբանանում ավարտվել է 7 էստոնացի հեծանվորդների առևանգման հետ կապված ոդիսականը: Հաղորդվում է, որ դեռ այս տարվա մարտին անհետացած խմբի անդամներն այսօր վաղ առավոտյան ազատ են արձակվել: Սակայն հայտնի չէ, թե ինչ պայմաններում է իրականացվել նրանց ազատարձակումը: Ինչպես հաղորդում է Reuters գործակալությունը, բոլոր 7 հեծանվորդները գտնվում են լիբանանյան Արսալ քաղաքում: Նրանք իրենց լավ են զգում:
Հիշեցնենք, որ դիմակավոր խումբն առևանգել էր էստոնացի զբոսաշրջիկներին 2011 թ. մարտին և յուրաքանչյուր պատանդի դիմաց պահանջել էր 2 միլիոն դոլար: Այնուհետև էստոնացիների մասնակցությամբ տեսանյութը հայտնվել էր Youtube-ում: Այս պահին հայտնի չէ՝ արդյո՞ք էստոնացիներն ազատ են արձակվել գրավի դիմաց: