ԱԺ պետաիրավական հարցերի մշտական հանձնաժողովում քննարկվում էր կառավարության նախագիծը, որով առաջարկվում է քրեական ենթամշակույթ կրող անձանց, խմբավորումներին ենթարկել քրեական պատասխանատվության։ Թեև նախագիծը ստացավ դրական եզրակացություն, սակայն որոշ պատգամավորներ, հատկապես ԲՀԿ-ական Գևորգ Պետրոսյանը ընդգծված դեմ արտահայտվեց նախագծին՝ հայտարարելով, որ Հայաստանի թիվ մեկ խնդիրը գողականները չեն, գողականները Հայաստանում չեն անհանգստացնում և, հետևաբար, կարիք չկա նրանց պատասխանատվության ենթարկել։ Պարզվում է, սակայն, Գևորգ Պետրոսյանը ԲՀԿ խմբակցությունում միակ պատգամավորը չէ, որ դեմ է գողականներին պատասխանատվության ենթարկելուն։ ԲՀԿ խմբակցության մեկ այլ պատգամավոր Վարդան Ղուկասյանն էլ «Առաջին լրատվական»-ի հետ զրույցում ասաց, որ թեև հարցը խմբակցության նիստում չի քննարկվել, սակայն ինքը դեմ է «ճշտով ապրողներին» քրեական պատասխանատվության ենթարկելուն՝ իբրև թե նրանք քրեական ենթամշակույթ են տարածում։
-Մենք հարցը խմբակցությունում չենք քննարկել, երբ որ քննարկենք, այդ ժամանակ էլ կներկայացնենք մեր տեսակետը։
–Բայց Դուք նախկինում, օրինակ, Քոչարյանի դեպքում չէիք խորշում կարծիք հայտնել այն պարագայում, երբ հարցը դեռ խմբակցությունում չէր քննարկվել։ Օրինակ՝ Ձեր խմբակցության պատգամավոր Գևորգ Պետրոսյանը հայտնում է իր կարծիքը։ Նա դեմ է այս նախագծին։ Դուք կարծիք չունե՞ք։
-Գիտեք ինչ, ես դեմ եմ, որ ընդհանրապես էդպես վերցնեն ու մարդկանց դատեն։ Եթե որևէ մեկը հանցանք կգործի, թող պատասխան տա, բայց ուղղակի վերցնել ու մարդկանց դատել, դեմ եմ։
–Բայց նախագծով չի առաջարկվում հենց այնպես դատել մարդկանց։ Այդ անձանց կողմից քրեական ենթամշակույթը տարածելու, դրան հարելու դեպքում է քրեական պատիժ սահմանվում։
-Գիտեք ինչ, այդ ամենը, ինչ որ եղել է, ինչ որ կա, ինչ-որ բանի դեմ, որ հիմա պայքարում են, այդ ամենը պետությունն է արել, ստեղծել։ Հիմա պետությունը էդ հիմնարկներում (նկատի ունի քրեակատարողական հիմնարկները․- Ս. Հ), որտեղ աշխատողներ ունի, էդ աշխատողների հետ միասին նրանց՝ ճիշտ ապրողների գլխին սարքողներն են։ Պետությունն իր աշխատողներով, ավելի ճիշտ՝ իրանց ստուկաչներով նրանց գլխին սարքում է։ Հիմա եթե պետությունը նման մոտեցում կցուցաբերի և նման ձևով իրոք ճշմարտությունը կհանի ջրի երես, ամեն ինչ նորմալ կլինի։
–Այսինքն՝ Ձեր կարծիքով՝ պետությո՞ւնն է մարդկանց սարքում քրեական ենթամշակույթի կրող, գողական։
-Այո։ Դա այն ժամանակներից էլ պետությունն է ստեղծել, և այդպես սարքել են մարդկանց գլխին, իսկ մաքուր մարդիկ, ճիշտ ապրող մարդիկ իրենց ճիշտ են պահել։ Ես ընդհանրապես մաքուր մարդկանց կողմնակից եմ, որ մարդիկ ստուկաչ չեն դառնում, իսկ պետության հետ ով համագործակցում է՝ համ այստեղ է, համ այնտեղ, նրանք ճիշտ մարդիկ չեն։
–Ասել է թե՝ Դուք դեմ եք, որ «ճշտով ապրող մարդկանց» պատասխանատվության ենթարկեն։
-Այո, ես դեմ եմ, որ մաքուր մարդկանց պատասխանատվության ենթարկեն։ Եթե մարդը հանցանք գործի, թող պատասխանատվություն կրի, իսկ եթե արարք չի կատարել, ինչու դատեն։
–Այսինքն՝ քրեական ենթամշակույթը տարածելը, դրանում ուրիշներին ներգրավելը Ձեզ համար հանցանք չէ։
-Գիտեք ինչ, տարածելը, բանը այլ բան է։ Ես չգիտեմ էլ՝ կան մարդիկ, որ քրեական վարքուբարքը տարածում են։ Ես մինչև էսօր չեմ հանդիպել նմանատիպ մարդու, որ նման բան տարածող լինի, երեխաներին փչացնող լինի։ Բայց այն, որ այդ ոլորտում էլ ստուկաչներ կան, պետության հետ աշխատողներ կան, դա հաստատ է։ Եվ հենց նրանք են սարքում խեղճ, շնորհքով, ինքնասիրություն, թասիբ, նամուս ունեցող մարդկանց գլխին։ Այ դրանց պետք է վերացնեն։ Դրանց թող վերացնեն, բան չունեմ ասելու։
–Նման օրենք արդեն իսկ ընդունել է Ռուսաստանի Դաշնությունը, Վրաստանը, և մտահոգություն կա, որ եթե Հայաստանում նման օրենք չլինի, ապա քրեականները, օրենքով գողերը կլցվեն Հայաստան։ Դուք մտահոգություն չունե՞նք այդ մասով։ Թե նման անձինք Ձեզ էլ չեն անհանգստացնում։
-Դա շատ հստակ կառավարելի հարց է։ Եթե պետությունը չուզենա, որ նման մարդիկ լցվեն Հայաստան, չեն լցվի։ Դա շատ հեշտ հարց է, որը ամբողջությամբ պետության ձեռքին է։
–Իսկ եթե այս օրենքը ընդունվի, Ձեր կարծիքով՝ ինչ իրավիճակ կստեղծվի Հայաստանում։
-Ես արդեն իմ կարծիքը հայտնեցի, ես դեմ եմ, որ մարդուն առանց հանցանք գործելու վերցնեն ու դատեն, իսկ թե հետագայում ինչ կլինի, ինչ կորոշի մեր խմբակցությունը, կներկայացնենք։